ដោយ ៖ សហការី
ថ្ងៃចន្ទ ទី១៦ ខែតុលា ឆ្នាំ២០១៧ ម៉ោង ២៣:១៨ (16-10-2017 23:18)
រាជធានីភ្នំពេញ ៖ បើយោងតាមសម្ដីក្រុមគ្រួសារអ្នកនាង សាន ស្រីឡៃ បានឲ្យដឹងថាឃាតកដែលបាញ់សម្លាប់អ្នកនាង សាន ស្រីឡៃ គឺជាស្វាមីរបស់អ្នកនាងដែលមានមុខងារជាមន្ត្រីគយនៅខេត្តព្រៃវែង ហើយលែងលះគ្នាមិនទាន់ដាច់ស្រេចក្រោយពេលអ្នកនាងប្រឡូកចូលក្នុងវិស័យសិល្បៈ និងការប្រកួតកម្មវិធីលំដាប់ពិភពលោក The Voice Cambodia រដូវកាលទី២ ព្រោះបុរសជាប្ដីមិនព្រមលែងលះ ដោយឲ្យយអ្នកនាងឈប់ពីវិស័យសិល្បៈជាច្រើនលើក ដោយបុរសជាប្ដីប្រចណ្ឌពេលដែលឃើញអ្នកនាងថតស្និទ្ធស្នាលជាមួយតារាប្រុសៗដទៃទៀត រហូតបុរសជាប្ដីបានតាមបាញ់សម្លាប់អ្នកនាង សាន ស្រីឡៃ ហើយបាញ់សម្លាប់ខ្លួនឯងនៅកន្លែងកើតហេតុ។ អ្វីដែលគួរឲ្យសោកសង្រេងនោះគឺក្មេងប្រុស២នាក់ដែលជាកូនបង្កើតអ្នកនាង សាន ស្រីឡៃ និងបុរសជាប្ដី ដែលទើបមានអាយុ៨ឆ្នាំ និង៦ឆ្នាំត្រូវកំព្រាឪពុកម្ដាយគួរឲ្យអាសូរ។
គួរបញ្ជាក់ថា នារសៀលថ្ងៃទី១៦ ខែតុលា ឆ្នាំ២០១៧ អ្នកនាង សាន ស្រីឡៃ អតីតបេក្ខភាព The Voice Cambodia នៅរដូវកាលទី២ ត្រូវអតីតស្វាមីរបស់នាងបាញ់ចំនួន៣គ្រាប់ពេលនាងកំពុងដើរចូលទៅក្នុងគ្លីនិក កែសម្ផស្សឈ្មោះ វ៉ាយតាឡុងហ្គោ ស្ថិតនៅផ្លូវ៣៦០ កែងផ្លូវ៥៧ សង្កាត់បឹងកេងកង១ ខណ្ឌចម្ការមន រាជាធានីភ្នំពេញ ក្រោយមកទើបបុរសជាប្ដីបាញ់សម្លាប់ខ្លួនឯងត្រង់សៀតផ្កាខាងស្តាំសម្លាប់ខ្លួនតាមក្រោយ។ យោងតាមឃ្លីបវីដេអូ សុវត្ថិភាពរបស់គ្លីនិកកែសម្ផស្សបានបង្ហាញថា បុរសជាអតីតស្វាមីបានបាញ់មួយគ្រាប់ ត្រូវខ្នងធ្វើឲ្យដួលតែម្តង រួចហើយបាញ់ថែម២គ្រាប់ទៀត ត្រូវក និងសៀតផ្កា ក្រោយមកទើបបាញ់ខ្លួនឯង ត្រង់សៀតផ្កាខាងស្តាំ ហើយដួលនៅក្បែរសាកសពនាងតែម្តង។
មន្ត្រីនគរបាលបានអះអាងថា អាវុធដែលប្រើសម្រាប់បាញ់ប្រហារអតីតភរិយា និងបាញ់ខ្លួនឯងនេះ ម៉ាក រ៉ូឡូ អត្តសញ្ញាណរបស់ជនដៃដល់ ត្រូវបានរកឃើញនៅលើខ្លួនជន មានអត្តសញ្ញាណបណ្ណសញ្ជាតិខ្មែរ មានប័ណ្ណសម្គាល់មន្ដ្រីរាជការ និងមានប័ណ្ណបើកបរ ព្រមទាំងលុយ និងសម្ភារមួយចំនួនទៀត។ ក្រោយកើតហេតុសពត្រូវបានក្រុមគ្រួសារដឹកបញ្ជូនទៅវត្តដើម្បីរៀបចំធ្វើបុណ្យតាមប្រពៃណីនៅវត្តសែនសុខ ក្នុងសង្កាត់ឃ្មួញ ខណ្ឌសែនសុខ។ ចំណែកសាកសពខ្មាន់កាំភ្លើងដែលជាប្តី ត្រូវបានបញ្ជូនទៅធ្វើបុណ្យតាមប្រពៃណី នៅឯស្រុកកំណើត ខេត្តព្រៃវែង៕
Loading...
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/