ថ្ងៃចន្ទ ទី១៦ ខែតុលា ឆ្នាំ២០១៧ ម៉ោង ១៦:២៥ (16-10-2017 16:25)
ខេត្តស្ទឹងត្រែង ៖ ក្មេងប្រុសអាយុទើបតែ៤ឆ្នាំម្នាក់ ត្រូវបានជនមិនស្គាល់មុខមួល.កសម្លាប់ យ៉ាងសាហាវព្រៃផ្សៃច្រកការុងរួចយកសពទៅប្លុងចោលក្នុងទឹកស្រះមួយកន្លែង ចម្ងាយប្រមាណជា២០០ម៉ែត្រពីផ្ទះ ។ សពក្មេងប្រុសនោះត្រូវបានគេប្រទះឃើញ កាលពីព្រឹកថ្ងៃទី១៥ តុលា ស្ថិតនៅក្នុងស្រះទឹក ត្រង់ចំណុចទួលវែង ភូមិពងក្រៀល ឃុំព្រែកមាស ស្រុកសៀមប៉ាង ។
ប្រភពព័ត៌មានបានឱ្យដឹងថា មុនថ្ងៃដែលគេប្រទះឃើញសពកុមាររងគ្រោះ គឺបន្ទាប់ពីក្មេងនោះបានបាត់ខ្លួនមួយថ្ងៃនៅថ្ងៃទី១៤ តុលា លុះដល់ព្រឹកថ្ងៃទី១៥ តុលា ត្រូវបានគេប្រទះឃើញសពនៅក្នុងការុងពណ៌ត្រួយចេកចងមាត់ជិតអណ្តែតនៅក្នុងទឹកស្រះចម្ងាយប្រមាណជា២០០ម៉ែត្រពីផ្ទះ ។ ទាក់ទិននឹងករណីឃាតកម្មខាងលើនេះ គេនៅមិនទាន់ដឹងអំពីដើមចម ដែលបណ្តាលឱ្យក្មេងប្រុសម្នាក់នោះ រងការសម្លាប់យ៉ាងព្រៃផ្សៃបែបនេះនៅឡើយទេ តែប្រភពមួយចំនួនបានដាក់ការមន្ទិលសង្ស័យជាច្រើន នៅពីក្រោយនៃការស្លាប់របស់ក្មេងប្រុសនេះ។
លោក ជឹម អេន អធិការនគរបាលស្រុកសៀមប៉ាងបានឱ្យដឹងថា ករណីឃាតកម្មលើក្មេងប្រុសនោះ នៅមិនទាន់មានពន្លឺសម្រាប់ធ្វើការសន្និដ្ឋានឱ្យច្បាស់នៅឡើយទេ ហើយពេលនេះ មន្ត្រីជំនាញបានរួមសហការជាមួយជំនាញនៃស្នងការដ្ឋាននគរបាលខេត្តដើម្បីស្រាវជ្រាវលើសំណុំរឿងនេះ ។
ប្រភពក្រៅផ្លូវការ ដែលពុំមានការអះអាងច្បាស់លាស់ បានបង្ហើបឱ្យដឹងថា ការស្លាប់របស់ក្មេងប្រុសខាងលើ អាចកើតចេញពីរង្វង់គ្រួសារ ពីព្រោះប្រសិនជាករណីប្លន់សម្លាប់ គេសម្លឹងទៅមើលគ្រួសារមួយនេះ មានជីវភាពក្រខ្សត់ខ្វះខាតសម្បើមណាស់ មិនមានមាសប្រាក់ សម្រាប់ឱ្យក្មេងប្រុសនោះពាក់ឡើយ ហើយប្រសិនជាករណីសម្លាប់ដើម្បីយកអវយវៈក៏ពុំមាននោះដែរ ។
ប្រភពមួយទៀតបាននិយាយថា ការសម្លាប់ក្មេងប្រុសនោះ អាចបង្កឡើងចេញពីការលេងសើច ដោយការចាប់បង្វិលក្បាលសង្កត់ធ្ងន់បង្កឱ្យដាច់សរសៃស្លាប់ ក៏ភ័យខ្លាចមានអ្នកដឹង ទើបយកច្រកការុងទៅប្លុងចោលក្នុងទឹកស្រះ។ ទោះយ៉ាងណា ប្រភពទាំងនេះគ្រាន់តែជាប្រភពបែបមន្ទិលសង្ស័យក្រៅផ្លូវការប៉ុណ្ណោះ តែការពិតយ៉ាងណានោះ នឹងត្រូវលាតត្រដាងក្រោយសមត្ថកិច្ចបំបែកសំណុំរឿងនៅពេលខាងមុខនេះ ។
លោក ហម ប៊ុនធែល ស្នងការរងទទួលផែនកណ្តាលនគរបាលយុត្តិធម៌នៃស្នងការដ្ឋាននគរបាលខេត្តស្ទឹងត្រែងបានឱ្យដឹងថា ក្មេងប្រុសរងគ្រោះឈ្មោះ ម៉ៅ តយ អាយុ៤ឆ្នាំ រស់នៅក្នុងបន្ទុកគ្រួសារ ដែលមានឪពុកឈ្មោះ សន ម៉ៅ អាយុ៣៩ឆ្នាំ និងម្តាយឈ្មោះ ចាន់ លី អាយុ២៨ឆ្នាំជាកសិករ និងជាកម្មករស៊ីឈ្នួលគេរស់នៅភូមិឃុំកើតហេតុខាងលើ ។ លោកបន្តថា បច្ចុប្បន្នកម្លាំងជំនាញរបស់ស្នងការដ្ឋានរួមមានកម្លាំងជំនាញព្រហ្មទណ្ឌនិងកម្លាំងការិយាល័យបច្ចេកទេសនិងកោសល្យវិច័យបានចុះទៅដល់ស្រុកសៀមប៉ាងដោយសហការជាមួយកម្លាំងអធិការដ្ឋាននគរបាលស្រុកសៀមប៉ាង ដើម្បីស្រាវជ្រាវលើសំណុំរឿងនេះហើយ តែជំហានដំបូងនៅមិនទាន់ដឹងពីមូលហេតុពិតប្រាកដនៅឡើយទេ ។
លោក ដួង ស៊ីវុត្ថា នាយការិយាល័យព្រហ្មទណ្ឌកម្រិតធ្ងន់នៃស្នងការនគរបាលខេត្តស្ទឹងត្រែងឱ្យដឹងថា ទាក់ទិនករណីឃាតកម្មខាងលើនេះ កម្លាំងជំនាញកំពុងដុតដៃដុតជើង ដើម្បីស្រាវជ្រាវទៅតាមជំនាញហើយករណីនេះពន្លឺ ស្ថិតនៅក្នុងការប្រទាញប្រទង់និងច្របូកច្របល់ច្រើន តែទោះយ៉ាងណា ជំនាញនឹងខិតខំប្រឹងប្រែងបំបែកករណីនេះឱ្យបានឆាប់ ៕
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/