ថ្ងៃពុធ ទី១៨ ខែតុលា ឆ្នាំ២០១៧ ម៉ោង ២១:២០ (18-10-2017 21:20)
ខេត្តកំពង់ឆ្នាំង ៖ សាកសពស្ត្រីម្នាក់ត្រូវបានប្រជាពលរដ្ឋប្រទះឃើញស្លាប់អណ្តែតទឹក នៅចម្ងាយប្រមាណជាង១០០ម៉ែត្រពីផ្ទះបណ្តែតទឹករបស់គាត់ រស់នៅស្ថិតក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង។ ហេតុការភ្ញាក់ផ្អើលនេះបានកើតឡើងនៅវេលាម៉ោង២ និង៣០នាទីរសៀល ថ្ងៃទី១៨ ខែតុលាឆ្នាំ២០១៧។ លោក ឆាយ ខែមរ័ត្ន អធិការនគរបាលក្រុងកំពង់ឆ្នាំង បានឲ្យដឹងថា សពស្ត្រីរងគ្រោះមានឈ្មោះ ក្រេន ម៉ៅ អាយុ៤៣ឆ្នាំ មានទីលំនៅភូមិថ្នល់ឈើទាល ឃុំផ្លូវទូក ស្រុកកំពង់លែង ប៉ុន្តែទើបបានអូសផ្ទះបណ្តែតទឹកមកស្នាក់នៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង បានតែ៤-៥ថ្ងៃ មុនថ្ងៃកើតហេតុតែប៉ុណ្ណោះ។
សមត្ថកិច្ចបានស្រង់សម្ដីគ្រួសាររងគ្រោះឲ្យដឹងថា កាលពីរសៀលថ្ងៃទី១៦ ខែតុលា ស្ត្រីរងគ្រោះខាងលើ បានអុំទូកចេញពីផ្ទះ ថាទៅទិញអីវ៉ាន់រួចក៏បាត់ខ្លួនរហូតមួយយប់ ស្អែកឡើងថ្ងៃទី១៧ ក្រុមគ្រួសារដើររកតែរកមិនឃើញ ស្រាប់តែឃើញតែទូកអណ្តែតលើទឹក តែមិនឃើញមនុស្ស ទោះខំចុះរាវរកយ៉ាងណាក៏មិនឃើញដែរ។ លុះដល់រសៀលថ្ងៃទី១៨ ខែតុលា ស្រាប់តែមានប្រជាពលរដ្ឋប្រទះឃើញស្លាប់អណ្តែតទឹក នៅចម្ងាយប្រមាណជា១០០ម៉ែត្រពីផ្ទះជនរងគ្រោះ។
ក្រោយពេលប្រទះឃើញសមត្ថកិច្ចបានចុះពិនិត្យធ្វើកោសល្យវិច្ច័យបានបញ្ជាក់ថា ស្ត្រីរងគ្រោះពិតជាស្លាប់ដោយសារការលង់ទឹកមែន ហើយបានប្រគល់សពស្ត្រី ជនរងគ្រោះទៅក្រុមគ្រួសារដើម្បីធ្វើបុណ្យតាមប្រពៃណី នៅវត្តខេមវន្ត ហៅវត្តខ្សាម ក្នុងក្រុងកំពង់ឆ្នាំង៕
Loading...
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/