ក្រុមប្រឹក្សាឃុំ-សង្កាត់
របស់គណបក្សសង្គ្រោះជាតិ
បន្តរួមគ្នាបង្ហាញជំហរគាំទ្របក្សប្រឆាំងរបស់ខ្លួន
ហើយតតាំងទៅនឹងព័ត៌មានមិនពិត ដែលឃោសនាតាមប្រព័ន្ធផ្សព្វផ្សាយក្នុងស្រុក
និង បណ្ដាញផ្សព្វផ្សាយសង្គម អំពីការចុះចូលទៅខាងបក្សកាន់អំណាច
ស្របពេលមន្ត្រីក្រុមប្រឹក្សាឃុំ-សង្កាត់របស់គណបក្សសង្គ្រោះជាតិ
ចាត់ទុកការប៉ុនប៉ងបែបនេះ ថាមានចរិតនយោបាយទុច្ចរិត។
ក្រុមប្រឹក្សាសង្កាត់ប៉ោយប៉ែត គណបក្សសង្គ្រោះជាតិ
ក្រុងប៉ោយប៉ែត ខេត្តបន្ទាយមានជ័យ បញ្ជាក់ជំហររបស់ខ្លួនថា
មិនបានចុះចូលទៅរួមរស់ជាមួយគណបក្សប្រជាជនកម្ពុជានោះទេ។
ក្រុមប្រឹក្សាសង្កាត់រូបនេះ អះអាង ថាព័ត៌មានដែលគេបង្ហោះ ថាលោកចុះចូល
ជាមួយបក្សកាន់អំណាចនោះ គឺជារឿងមិនពិត។
មន្ត្រីក្រុមប្រឹក្សាសង្កាត់ប៉ោយប៉ែត
ពីខាងគណបក្សសង្គ្រោះជាតិ លោក សាន់ អែលម៉ាត់ អះអាង ថាថ្មីៗនេះ មានគេមកចែចូវ
រូបលោកឲ្យទៅរួមរស់ ជាគណបក្សប្រជាជនកម្ពុជាមែន
ក៏ប៉ុន្តែមិនបានសម្រេចដូចបំណងទេ។ លោក សាន់ អែលម៉ាត់ ឲ្យដឹងនៅនៅថ្ងៃទី២៧
តុលានេះ ថា មន្ត្រីសាលាក្រុងប៉ោយប៉ែតម្នាក់ ប៉ុន្តែលោកថាមិនស្គាល់ឈ្មោះ
បានមកចែចូវលោក ឲ្យទៅចុះចូលគណបក្សកាន់អំណាច
តាមរយៈអ្នកកាសែតក្នុងស្រុកម្នាក់ នៅក្រុងប៉ោយប៉ែត។
ក្រុមប្រឹក្សាសង្កាត់ប៉ោយប៉ែតរូបនេះ អះអាងទៀតថា ចំពោះវីដេអូឃ្លីបដែលថា
លោកចុះចូលជាមួយគណបក្សប្រជាជនកម្ពុជានោះ
គឺជាការបំផ្លើសខុសពីការទាំងស្រុង៖ «អាហ្នឹងគេហៅទៅជួបពីរដង
ឥឡូវខ្ញុំសម្រេចថាឈប់ទៅជួប ហើយដូរលេខទូរស័ព្ទហើយឥឡូវ។
គេឲ្យខ្ញុំចូលគណបក្សប្រជាជនទៅ។ គេមិនឲ្យលុយកាក់អីទេ
គ្រាន់ហៅឲ្យចុះចូល។ ខ្ញុំថាអត់ទាន់ចូលទេ»។
កាសែតក្នុងស្រុក ហ្វ្រេសញូវ (Fresh News) ដែលគាំទ្ររដ្ឋាភិបាល
បានចុះផ្សាយនៅថ្ងៃទី២៧ ខែ តុលា នេះ ដោយភ្ជាប់ជាមួយវីដេអូ
ដែលកាត់មួយផ្នែកខ្លី
និងកាត់តសម្ដីសមាជិកក្រុមប្រឹក្សាសង្កាត់ប៉ោយប៉ែតលោក សាន់ អែលម៉ាត់
ដោយភ្ជាប់ជាមួយលិខិតមួយមានរូបថតលោក កាលលោកនៅធ្វើជាអ្នកកាសែតយូរហើយ
និងមានស្នាមមេដៃលោកផង។ លិខិតនោះ គឺជាទម្រង់លិខិតសុំចុះចូលជាមួយគណបក្សប្រជាជនកម្ពុជា។
ប៉ុន្តែ លោក សាន់ អែលម៉ាត់ បដិសេធរហូតដល់ទៅពីរលើក គឺមួយលើកនៅថ្ងៃទី២៥ ខែ
តុលា និងលើកទីពីរ នៅថ្ងៃទី២៦ ខែ តុលា ដោយបញ្ជាក់ ថា នោះជាលិខិតក្លែងក្លាយ
និងថាគេលួចក្លែងបន្លំ យកស្នាមមេដៃគាត់យកមកប្រើ ដើម្បីបំភាន់មតិ ព្រោះ
ស្នាមមេដៃនោះ គាត់ផ្ដិតយូរហើយ កាលគាត់នៅធ្វើជាអ្នកកាសែត៖ «អាហ្នឹងរូបខ្ញុំ ប៉ុន្តែរូបខ្ញុំយូរហើយ កាលធ្វើការកាសែតយូរហើយ។
ស្នាមមេដៃក៏ផ្តិលយូរហើយដែរ ផ្ដិតកាលធ្វើកាសែត។
ខ្ញុំសូមបដិសេធទាំងស្រុង។ សូមប្រជាពលរដ្ឋទាំងអស់
កុំជឿការមួលបង្កាច់របស់គាត់។ ខ្ញុំគាំទ្រការពារប្រជាពលរដ្ឋទាំងអស់
នៅសង្កាត់ប៉ោយប៉ែតយើងខ្ញុំ។ អត់ក្បត់ឧត្ដមគតិរបស់ខ្ញុំទេ»។
ទាក់ទងនឹងបញ្ហានេះដែរ ចៅសង្កាត់ប៉ោយប៉ែត
គណបក្សសង្គ្រោះជាតិលោក កង សុខឿន មានប្រសាសន៍ថា ក្រុមប្រឹក្សាគណបក្សលោកទាំង៨រូប
គឺគោរពតាមឆន្ទៈរបស់ម្ចាស់ឆ្នោត ស៊ូស្លាប់ជាមួយគណបក្សរបស់ខ្លួន
ដោយមិនលក់ឧត្ដមគតិខ្លួនឡើយ៖ «ក្នុងលិខិតសុំចូលគេហ្នឹង
តាមពិតគេរៀបឲ្យទេ។ គេសរសេរ គេធ្វើបែបបទអីអស់ហើយហ្នឹង។
ខ្ញុំបញ្ជាក់សួរគាត់ គាត់ថាគាត់មិនបានផ្ដិតមេដៃទេ។ មិនបានដឹងអីទេ។
ប៉ុន្តែ មានគេហៅគាត់ម្ដងជាពីរដង។
ព្រឹកមិញនេះខ្ញុំក៏ព្យាយាមទៅជួបអ្នកដែលហៅគាត់ទៅនេះដែរ។
គាត់ហ្នឹងឈ្មោះ កែវ សាវន ធ្លាប់ធ្វើកាសែតជាមួយគាត់។
គាត់ជាអ្នកកាសែតមួយដែរ មុននឹងចូលធ្វើអ្នកនយោបាយ»។
ព័ត៌មានមិនពិតនៃការចុះចូលគណបក្សកាន់អំណាចនេះ
ត្រូវបានផ្សព្វផ្សាយតាមបណ្ដាញសង្គមហ្វេសប៊ុក អំពីលោកចៅសង្កាត់រងទី២
សង្កាត់ស្ទឹងត្រែង ខេត្តស្ទឹងត្រែង និង សមាជិកក្រុមប្រឹក្សាឃុំ-សង្កាត់របស់គណបក្សសង្គ្រោះជាតិទាំងអស់បួនរូប
ដែលផ្សាយថា បានរត់ទៅចុះចូលជាមួយគណបក្សប្រជាជនកម្ពុជា។ ភ្លាមៗនោះ
លោកចៅសង្កាត់រងទី២ សង្កាត់ស្ទឹងត្រែង ខេត្តស្ទឹងត្រែង លោក តូ ស៊ីសុបុត
ក៏បានចេញវីដេអូឃ្លីប តាមហ្វេសប៊ុក បដិសេធទាំងស្រុង នៅព័ត៌មានមិនពិត
ដែលមានចរិតបំបែកបំបាក់គណបក្សសង្គ្រោះជាតិបែបនេះ៖ «ខ្ញុំ តូ ស៊ីសុបុត ចៅសង្កាត់រងទី២ សង្កាត់ស្ទឹងត្រែង
មកពីគណបក្សសង្គ្រោះជាតិ។ ខ្ញុំសូមបដិសេធទាំងស្រុង
ចំពោះហ្វេសប៊ុកអាខោនចាស់របស់ខ្ញុំ ត្រូវចោរលួចយកទៅប្រើប្រាស់។
ខ្ញុំសូមបញ្ជាក់ដល់មហាជនទាំងអស់ ឲ្យបានជ្រាបថា ខ្ញុំគ្មានបំណងចាកចេញពីគណបក្សសង្គ្រោះជាតិនោះទេ
សូម្បីតែយល់សប្ដិក៏គ្មានដែរ។ ខ្ញុំនឹងបន្តឆន្ទៈរបស់ខ្ញុំ
ជាមួយគណបក្សសង្គ្រោះជាតិជារៀងរហូត»។
ចំពោះព័ត៌មានមិនពិត និងការលួចក្លែងគណនីយហ្វេសប៊ុក
ដើម្បីផ្សាយព័ត៌មានបំផ្លើសអំពីការចុះចូលរបស់មន្ត្រីក្រុមប្រឹក្សាឃុំ-សង្កាត់នេះ
លោក សារ៉ូ សុវុឌ្ឍិ ដែលជាចៅសង្កាត់រងសង្កាត់និមិត្ត ក្រុងប៉ោយប៉ែត
ពីខាងគណបក្សសង្គ្រោះជាតិ លោកមិនភ្ញាក់ផ្អើលទេ។ ប៉ុន្តែ
លោកនៅតែជឿជាក់លើមន្ត្រីជាប់ឆ្នោតទាំង ១៨រូប ថាមានឆន្ទៈមិនផ្លាស់ប្ដូរ
ក្នុងការបន្តរួមរស់ជាមួយគណបក្សប្រឆាំង ទោះក្នុងកាលៈទេសៈណាក៏ដោយ៖ «ក្រុមប្រឹក្សាទាំង៨រូប របស់គណបក្សសង្គ្រោះជាតិ
ទូទាំងក្រុងប៉ោយប៉ែត យើងបានជួបជុំគ្នាហើយ គឺយើងមានឆន្ទៈរួមមួយ
គឺមិនមានការក្បត់នឹងឆន្ទៈសន្លឹកឆ្នោតទេ។ ទោះជាមានការបំភិតបំភ័យ
ទោះជាមានការទិញទឹកចិត្តយ៉ាងណា
ក៏ពួកយើងខ្ញុំនៅតែរក្សាស្មោះត្រង់នឹងម្ចាស់ឆ្នោត ស្មោះត្រង់ជាមួយគណបក្ស
និងស្មោះត្រង់ជាមួយប្រជាពលរដ្ឋ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា ហៅ ការបញ្ចុះបញ្ចូលក្រុមប្រឹក្សាសង្កាត់ប៉ោយប៉ែតនេះថា
ជាបច្ចេកទេសផ្នែកនយោបាយ ដើម្បីឈ្នះការបោះឆ្នោតនៅពេលខាងមុខ។ ក៏ប៉ុន្តែ
លោកអះអាងថា ប្រសិនបើសកម្មភាពនេះធ្វើឡើងដោយការបង្ខិតបង្ខំ
ចាត់ជាទង្វើស្មោកគ្រោក ដើម្បីបំពេញមហិច្ឆតានយោបាយរបស់ខ្លួន៖ «បើសិនជាបានមក ក៏គេដាក់បណ្ដាសា អាហ្នឹងនិយាយឲ្យត្រង់ និងចំ។
ខ្ញុំគិតថា យើងគួរតែនាំគ្នាបង្កើតវប្បធម៌អហិង្សា និយាយគ្នាទៅ
កុំឲ្យមានការគំរាមកំហែង
កុំឲ្យមានការប្រើប្រាស់ល្បិចកិច្ចកលអាក្រក់ដាក់គ្នា
ព្រោះយើងជាខ្មែរដូចគ្នា រស់ក្នុងសង្គមខ្មែរដូចគ្នា»។
គណបក្សសង្គ្រោះជាតិ
ចាត់ទុកការធ្វើទុក្ខបុកម្នេញមកលើគណបក្សប្រឆាំង ពីសំណាក់បក្សកាន់អំណាច
ថាមានចរិតនយោបាយសុទ្ធសាធ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ
យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Loading...
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/