អ្នកវិភាគម្នាក់លើកឡើងថា “បើចេះតែត្រឹមបាញ់បោះ ជាតិមួយ មិនរស់ទេ”

(ប៉ារីស) ៖ លោក សូរ សមយុទ្ធ អ្នកនិពន្ធ និងជាអ្នកវិភាគដ៏ល្បីម្នាក់នៅលើបណ្ដាញសង្គមហ្វេសប៊ុក បានលើកឡើងថា “បើចេះតែត្រឹមបាញ់បោះ ជាតិមួយ មិនរស់ទេ”។ លោកថា បើចង់ដឹងថាតើ រឿងការពារជាតិលំបាកប៉ុណ្ណានោះ មានតែរដ្ឋមន្ត្រីក្រសួងសេដ្ឋកិច្ច ហិរញ្ញវត្ថុ និងរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិទេ ទើបដឹងច្បាស់។

ការលើកឡើងរបស់លោក សូរ សមយុទ្ធ ត្រូវបានគេដឹងថា ជាការឆ្លើយតបទៅនឹងប្រសាសន៍របស់លោក ទា បាញ់ រដ្ឋមន្ត្រីក្រសួងការពារជាតិ ដែលបានចេញមកប្រកាសជាសាធារណៈកាលពីរសៀលថ្ងៃទី១៦ ខែតុលា កន្លងទៅថ្មីៗនេះថា “គណបក្សសង្គ្រោះជាតិនឹងរលាយនៅថ្ងៃខាងមុខនេះ ហើយកងទ័ពទាំងអស់ត្រូវត្រៀមរួចជាស្រេចប្រឆាំងបុគ្គលទាំងឡាយណា ដែលចង់បង្កភាពវឹកវរដល់សង្គម នឹងចង់ផ្ដួលរំលំរាជរដ្ឋាភិបាលស្របច្បាប់។”

តាមរយៈបណ្ដាញសង្គមដ៏ពេញនិយម លោក សូរ សមយុទ្ធ បានលើកឡើងយ៉ាងដូច្នេះថា៖ “ជាទូទៅ អ្នកកាន់ការងារកងទ័ព ដឹងតែពីរឿងកាប់ចាក់ បាញ់បោះ តែប៉ុណ្ណោះ។ ប៉ុន្តែបើចង់ដឹងថា តើការពារជាតិលំបាកយ៉ាងណានោះ ទៅសួរ រដ្ឋមន្ត្រីក្រសួងសេដ្ឋកិច្ច ហិរញ្ញវត្ថុ និងរដ្ឋមន្ត្រីក្រសួងការបរទេស បានដឹង។ ចេះតែត្រឹមបាញ់បោះ ជាតិមួយ មិនរស់ទេ។”

គួរកត់សម្គាល់ថា រដ្ឋាភិបាលលោក ហ៊ុន សែន បានរុញច្រានស្ថានការណ៍នយោបាយនៅកម្ពុជាឲ្យកាន់តែអាក្រក់ទៅៗ ដោយប្រើប្រាស់តុលាការអាយ៉ង និងសភាទីងមោងរបស់ខ្លួន ព្យយាមកម្ចាត់គណបក្សសង្គ្រោះជាតិ ដែលមានអ្នកគាំទ្រកន្លះប្រទេស ដើម្បីបំពេញមហិច្ចតាបន្តគ្រប់គ្រងអំណាចតទៅទៀត។ ជាក់ស្ដែង នាពេលថ្មីៗនេះ រដ្ឋសភា និងព្រឹទ្ធសភា កម្ពុជា បានអនុម័តជាបន្តបន្ទាប់លើសេចក្ដីស្នើវិសោធនកម្មច្បាប់ ចំនួន៤ ពាក់ព័ន្ធនឹងការរំលាយគណបក្សនយោបាយ និងការបែងចែកអាសនៈ ។ ចំណែកឯតុលាការកំពូល ទុកពេលឲ្យគណបក្សសង្គ្រោះជាតិរយៈពេល ២០ ថ្ងៃ ដើម្បីរៀបចំឯកសារតបទៅនឹងពាក្យបណ្ដឹងរំលាយ៕

Loading...