Loading...
លោកនាយករដ្ឋមន្ត្រីហ៊ុន សែន ក្រសួងយុត្តិធម៌ និងគណបក្សហ្វុនស៊ីនប៉ិច នៅរសៀលថ្ងៃអង្គារនេះ បានដាក់ពាក្យបណ្តឹង ជាបន្តបន្ទាប់គ្នាទៅតុលាការក្រុងភ្នំពេញ ដើម្បីប្តឹងលោក លឺ ឡាយស្រេង អតីតមន្ត្រីជាន់ខ្ពស់គណបក្សហ្វុនស៊ីនប៉ិច។ ការសម្រេចប្តឹងព្រមៗគ្នា ពេលនេះ ធ្វើឡើងបន្ទាប់ពីលោកលឺ ឡាយស្រេង បានថ្លែងតាមបណ្តាញសង្គមប៉ះពាល់ដល់ព្រះមហាក្សត្រ ប៉ះពាល់កិត្តិយសលោកហ៊ុន សែន និងបរិហារដល់សម្តេចក្រុមព្រះ នរោត្តម រណឫទ្ធិ ប្រធានគណបក្សហ្វុនស៊ីនប៉ិច។
លោក គី តិច មេធាវីរបស់លោកនាយករដ្ឋមន្ត្រី បានថ្លែងថានៅក្នុងពាក្យបណ្តឹងរបស់លោកគឺបានស្នើសុំឲ្យតំណាងអយ្យការសាលាដំបូងរាជធានីភ្នំពេញទី១ ធ្វើការចោទប្រកាន់និងផ្តន្ទាទោសលោក លឺ ឡាយស្រេង តាមផ្លូវច្បាប់។ ទី២ទារសំណងជំងឺចិត្តដែលលោក លឺ ឡាយស្រេង ធ្វើឲ្យបាត់បង់កិត្តិយសលោកហ៊ុន សែន ចំនួន៥០០លានរៀល និងចុងក្រោយសុំឲ្យតុលាការប្រកាសផ្តន្ទាទោសបន្ថែមតាមមាត្រា៣១០នៃក្រមព្រហ្មទណ្ឌ។
ការសម្រេចប្តឹងលោកលឺ ឡាយស្រេង អតីតមន្ត្រីជាន់ខ្ពស់គណបក្សហ្វុនស៊ីនប៉ិចនៅពេលនេះ បានធ្វើឡើងបន្ទាប់ពីលោក លឺ ឡាយស្រេង ថ្លែងតាមប្រព័ន្ធហ្វេសប៊ុករបស់លោកថា លោកនាយករដ្ឋមន្ត្រី ហ៊ុន សែន បានផ្តល់លុយដល់មន្ត្រីហ្វុនស៊ីនប៉ិចម្នាក់២ម៉ឺនដុល្លារ សរុបជិត១លានដុល្លារ ដែលចំណុចនេះ ត្រូវមេធាវីដើមបណ្តឹងថាជាការបរិហាកេរ្តិ៍ជាសាធារណៈ។
នៅថ្ងៃនេះដែរ ក្រសួងយុត្តិធម៌ ក៏បានស្នើទៅតុលាការក្រុងភ្នំពេញដែរ ដោយសុំឲ្យតុលាការចាត់វិធានការផ្លូវច្បាប់ជាបន្ទាន់ និងតឹងរឹងបំផុត ទៅលើលោកលឺ ឡាយស្រេង ចំពោះករណីប្រមាថយ៉ាងធ្ងន់ធ្ងរដល់ព្រះចេស្តាអង្គព្រះមហាក្សត្រ។ នៅក្នុងលិខិតរបស់ក្រសួងយុត្តិធម៌ រដ្ឋលោករដ្ឋមន្ត្រីអង្គ វង្ស វឌ្ឍនា បានលើកយកស្មារតីរដ្ឋធម្មនុញ្ញកម្ពុជាមាត្រា៧ មកបញ្ជាក់ថា«អង្គព្រះមហាក្សត្រ មិនអាចនរណារំលោភបំពានបានឡើយ»។
ដោយឡែកអ្នកនាំពាក្យគណបក្សហ្វុនស៊ីនប៉ិច លោក ញ៉េប ប៊ុនជិន ក៏បានបញ្ជាក់ដែរថា មេធាវីគណបក្សហ្វុនស៊ីនប៉ិច បានដាក់ពាក្យរួចហើយទៅតុលាការដោយប្តឹងលោកលឺ ឡាយស្រេង ពីបទប្រមាថកាតទានព្រះចេស្តាអង្គព្រះមហាក្សត្រ បរិហារកេរ្តិ៍សម្តេចក្រុមព្រះនិងថ្នាក់ដឹកនាំជាតិ។
សូមបញ្ជាក់ថា កាលពីចុងសប្តាហ៍មុនហ្វេសប៊ុកឈ្មោះ សីហា បានបញ្ចេញសំឡេងសន្ទនាឯកជនតាមទូរស័ព្ទរវាងលោក លឺ ឡាយស្រេង និងលោកស្រី គី លំអង បង្ហាញថានៅក្នុងកិច្ចសន្ទនានោះលោក លឺ ឡាយស្រេង បានថ្លែងក្នុងន័យថា ឲ្យព្រះមហាក្សត្រដាក់រាជ្យ បើឡាយព្រះហស្តលេខាលើច្បាប់ទាំង ៤ដែលអនុម័តដោយតំណាងរាស្ត្រគណបក្សប្រជាជនកម្ពុជា។លើសពីនេះ លោកលឺ ឡាយស្រេង ក៏បាននិយាយរាលដាលដល់សម្តេចក្រុមព្រះ ប្រធានគណបក្សហ្វុនស៊ីនប៉ិច រឿងទទួលលុយពីលោកហ៊ុន សែន ជិត១លានដុល្លារ ទៅចែកមន្ត្រី ដែលជាដើមហេតុនាំឲ្យមានកើតបណ្តឹងចាក់ស្រេះទាំងនេះឡើងក្នុងពេលតែមួយ។ ទោះយ៉ាងណា មុននឹងចាកចេញទៅក្រៅប្រទេសកាលពីថ្ងៃចន្ទ លោកលឺ ឡាយស្រេង ក៏បានថ្លែងសុំទោសផងដែរតាមប្រព័ន្ធហ្វេសប៊ុក តែអ្នកពាក់ព័ន្ធមិនអាចទទួលយកបាន៕
Loading...
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/