នាំគ្នាចែកចាយរូបសត្វចម្លែក រូបរាងដូចមនុស្សពាសពេញអ៊ីនធឺណេត ផ្អើលដល់ប៉ូលិសនៅម៉ាឡេស៊ី (មាន​វីដេអូ)

ម៉ាឡេស៊ី៖ ពាក្យចចាមអារ៉ាមបង្កឲ្យមានការភ្ញាក់ផ្អើលពេញអ៊ីនធឺណេត ដោយមានការលើកឡើងថាមានសត្វចម្លែកមួយក្បាល មានរូបរាងដូចមនុស្ស ត្រូវគេប្រទះឃើញក្នុងប្រទេសម៉ាឡេស៊ី។ 

បើយោងតាមប្រភពព័ត៌មាន Mirror UK បានឲ្យដឹងថា ឃ្លីបវីដេអូមួយត្រូវបានគេចែករំលែកបន្តគ្នាពាសពេញអ៊ីនធឺណេត ដែលក្នុងនោះគេឃើញមានសត្វចម្លែកដ៏តូចមួយក្បាល មានដងខ្លួនដូចសត្វឆ្មា តែក្បាលដូចមនុស្ស មានចង្កូមមួយគូមុតស្រួចដូចបិសាចជញ្ជក់ឈាមយ៉ាងអ៊ីចឹង។ 

ឃ្លីបវីដេអូមួយនេះត្រូវបានគេរាយការណ៍ថា ត្រូវបានគេថតបង្ហោះនៅតំបន់ Pahang ភាគខាងលិចប្រទេសម៉ាឡេស៊ី ដែលគេអះអាង ថាបានរកឃើញវានៅព្រំប្រទល់តំបន់ Pahang នេះឯង។

យ៉ាងណាមិញ វាមិនយូរប៉ុន្មានទេដែល រឿងរ៉ាវដ៏សែនចម្លែកមួយនេះបានជ្រួតជ្រាបដល់ស្ថាប័នប៉ូលិសក្នុងប្រទេសនេះ  ហើយដោយទ្រាំមិនបាន មន្ត្រីប៉ូលិសនៅក្នុងតំបន់ ក៏ចេញមុខច្រានចោល ថាវាជារឿងបោកប្រាស់សុទ្ធសាធ ពោលគឺគ្មានភស្តុតាងត្រឹមត្រូវណាមួយយកមកសំអាងបាននោះឡើយ។

បន្ថែមពីលើនេះ ស្នងការប៉ូលិសប្រចាំប្រទេសម៉ាឡេស៊ី លោក Datuk Rosli Abdul Rahman បានឲ្យដឹងថា សត្វចម្លែកដែលគេអះអាងមួយនេះ វាជាប្រដាប់ប្រដារក្មេងលេងដែលគេលក់តាមអនឡាញតែប៉ុណ្ណោះ ហើយលោកព្រមទាំងអំពាវនាវបងប្អូនអ្នកនិយមលេងអ៊ីនធឺណេតទាំងអស់ ឈប់គិតផ្តេសផ្តាសអំពីវាតទៅទៀត នាំតែអត់ប្រយោជន៍។

គួរបញ្ជាក់ផងដែរថា កន្លងទៅមានរឿងចម្លែកដូចគ្នានេះដែរ ដែលរូបភាពសត្វពពែចម្លែក មានក្បាលមនុស្សមួយ បានបង្កឲ្យភាពការឆោឡាពាសពេញភូមិស្រុកមួយនៅប្រទេសឥណ្ឌា ហើយរូបភាពចម្លែកៗជាច្រើនរបស់វា ត្រូវបានគេចែកចាយបន្តគ្នានៅលើបណ្តាញសង្គមហ្វេសប៊ុក៕ 

Loading...