ភ្នំពេញ ៖ បន្ទាប់ពីផេកហ្វេសប៊ុកមួយឈ្មោះ «សមាគមវៀតណាមនៅកម្ពុជា» បានសរសេរសារមានខ្លឹមសារប្រមាថព្រះមហាក្សត្រខ្មែរ បានធ្វើឲ្យអ្នកប្រើប្រាស់បណ្ដាញសង្គមដែលជាជនជាតិខ្មែរ ក្ដៅស្លឹកត្រចៀក និងអំពាវនាវឲ្យអាជ្ញាធរចាត់វិធានការលើទំព័រហ្វេសប៊ុកនោះ នៅថ្ងៃទី២៣ តុលា ២០១៧នេះ លោកខៀវ សុភ័គ អ្នកនាំពាក្យក្រសួងមហាផ្ទៃ អះអាងប្រាប់វិទ្យុក្នុងស្រុកមួយថា ម្ចាស់ទំព័រហ្វេសប៊ុកនេះ ជាអ្នករស់នៅក្រៅប្រទេស មានសញ្ជាតិ២ ហើយជាបក្សពួកជាមួយលោកសម រង្ស៊ី ។
អ្នកនាំពាក្យក្រសួងមហាផ្ទៃ លោកខៀវ សុភ័គ បញ្ជាក់ថា ក្រសួងមិនមានសមត្ថកិច្ចចាត់ការលើទំព័រហ្វេសប៊ុកនេះទេ ។ បើតាមការបញ្ជាក់បន្ថែមពីលោកខៀវ សុភ័គ ជាសំឡេងថា….
ប៉ុន្តែបើតាមការស្រាវជ្រាវកន្លងមករបស់ក្រសួងមហាផ្ទៃ សមាគមវៀតណាមនៅកម្ពុជានេះ គ្មានបានចុះបញ្ជីត្រឹមត្រូវនៅក្រសួងមហាផ្ទៃទេ ។ ហើយម្ចាស់ទំព័រនេះ ក៏មិនរស់នៅស្រុកខ្មែរដែរ ។ ដូច្នេះវាហួសពីសមត្ថកិច្ចរបស់ក្រសួង ក្នុងការចាត់វិធានការ ។ យ៉ាងណាក៏ដោយ លោក ខៀវ សុភ័គ អះអាងថា ក្រសួងមានការប្ដេជ្ញាចិត្តខ្ពស់ណាស់ក្នុងការចាត់ការចំពោះរាល់ការជេរប្រមាថព្រះមហាក្សត្រខ្មែរ ។
មហាជនអ្នកប្រើប្រាស់បណ្តាញសង្គមជាច្រើន បានប្រតិកម្មចំពោះការប្រមាថលើព្រះមហាក្សត្រខ្មែរយ៉ាងដូច្នេះ ហើយពួកគេជំរុញឲ្យអាជ្ញាធរកម្ពុជា ចាត់វិធានការលើទំព័រហ្វេសប៊ុកឈ្មោះ សមាគមវៀតណាមនៅកម្ពុជា មួយនេះ ។
គួរបញ្ជាក់ថា នេះមិនមែនជាលើកទីមួយទេ ដែលទំព័រហ្វេសប៊ុកឈ្មោះ សមាគមវៀតណាមនៅកម្ពុជា ទំព័រហ្វេសប៊ុក ដែលបង្កើតតាំងពីចុងឆ្នាំ២០១៤ បានវាយប្រហារ និងប្រមាថព្រះមហាក្សត្រខ្មែរ ។ កាលពីដើមខែមីនា ទំព័រហ្វេសប៊ុកនេះ បានប្រកាសហាមមិនឲ្យហៅវៀតណាមណាមួយថា យួនដាច់ខាត បើហៅ ឬជេរ ដាច់ខាតត្រូវចាប់ដាក់គុក ទោះស្តេច នរោត្តម សីហមុនី ក៏ដោយ ។
ជាមួយគ្នានេះដែរសមាគមសហព័ន្ធខ្មែរ-វៀតណាមនៅកម្ពុជា ធ្លាប់បានចេញមុខមកបញ្ជាក់ភាពស្អាតស្អំរបស់ខ្លួន ដោយថា សមាគមមិនដែលបង្កើតទំព័រហ្វេសប៊ុកណាមួយឡើយ។ សមាគមក៏បានអំពាវនាវឲ្យមានវិធានការផ្លូវច្បាប់ ចំពោះជនក្លែងបន្លំហ្វេសប៊ុកនេះ ដែលធ្វើឲ្យប៉ះពាល់ដល់កិត្តិយសសមាគម និងជាការញុះញង់មួយមិនអាចទទួលយកបាន។ សមាគមសហព័ន្ធខ្មែរ-វៀតណាមនៅកម្ពុជា អះអាងថា ជានិច្ចកាលតែងតែគោរពព្រះមហាក្សត្រ ក៏ដូចជាអនុវត្តគោរពតាមច្បាប់កម្ពុជា ៕
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/