មេឃុំ
និងក្រុមប្រឹក្សាឃុំ-សង្កាត់ដែលស្មោះនឹង គណបក្សសង្គ្រោះជាតិថា
បើពួកគេសុខចិត្តទៅធ្វើស្រែ ក៏មិនចុះចូលជាមួយលោក ហ៊ុន សែន
ដើម្បីរក្សាដំណែង និងប្រាក់ខែរបស់ខ្លួនដែរ។
ការបង្ហាញភក្ដីភាពរបស់មន្ត្រីថ្នាក់ក្រោម នៃគណបក្សសង្គ្រោះជាតិនៅពេលនេះ
ខណៈលោក ហ៊ុន សែន និយាយម្ដងហើយម្ដងទៀតថា
លោកនឹងទុកតួនាទីមុខដំណែងឲ្យពួកគេនៅដដែល
ឲ្យតែមករួមរស់ជាមួយគណបក្សប្រជាជនកម្ពុជាវិញ។
ស្របពេលដែលសមាជិកក្រុមប្រឹក្សាឃុំ-សង្កាត់ ខេត្ត ក្រុង របស់គណបក្សសង្គ្រោះជាតិមួយចំនួនតូច
រត់ចូលគណបក្សប្រជាជនកម្ពុជា ព្រោះខ្លាចបាត់ដំណែងនោះ។
ក្រុមពលរដ្ឋម្ចាស់ឆ្នោតដែលគាំទ្រគណបក្សប្រឆាំងផ្ដាំផ្ញើ
អ្នកដែលស្មោះចំពោះបក្សតាមរយៈអាស៊ីសេរីថា
ពួកគេនឹងការពារមិនឲ្យមានការរំលាយគណបក្សសង្គ្រោះជាតិនោះទេ។
សមាជិកក្រុមប្រឹក្សាឃុំគណបក្សសង្គ្រោះជាតិម្នាក់ មកពីខេត្តព្រៃវែង
សុំមិនបញ្ចេញព្រោះខ្លាចមានបញ្ហាសុវត្តិភាព ប្រាប់អាស៊ីសេរីថា
លោកសុខចិត្តទៅ ធ្វើស្រែក៏មិនចុះចូលជាមួយគណបក្សកាន់អំណាចដែរ។ លោកថា
ការចុះរត់ទៅចូលជាមួយគណបក្សប្រជាជនកម្ពុជា
ព្រោះចង់រក្សាដំណែងដែលកើតចេញពីការបោះឆ្នោត គឺជាការក្បត់ឆន្ទៈម្ចាស់ឆ្នោត៖ «មានតែគណបក្សសង្គ្រោះជាតិទេ ដែលពលរដ្ឋជាង ៣លាន់នាក់គាំទ្រ
ខ្ញុំសុខចិត្តឈប់ដើម្បីប្រកបអាជីវកម្មធ្វើស្រែចម្ការ ទោះបីរស់នៅយ៉ាងមិច
ក៏សុខចិត្តនៅជាមួយគណបក្សសង្គ្រោះជាតិ»។
ខណៈក្រុមប្រឹក្សារបស់គណបក្សសង្គ្រោះជាតិមួយចំនួនតូច
បានប្រកាសតាមបណ្ដាញទំនាក់ទំនងសង្គមហ្វេសប៊ុក (Facebook) ពីការចូលរួមជីវភាពនយោបាយជាមួយគណបក្សកាន់អំណាច។
ក៏មានឃុំស្មោះនឹងគណបក្សសង្គ្រោះជាតិ ប្រកាសតាមហ្វេសប៊ុកដូចគ្នាថា
ខ្លួនមិនក្បត់ឆន្ទៈម្ចាស់ឆ្នោតជាដាច់ខាត។
សមាជិកក្រុមប្រឹក្សាសង្កាត់អូរជ្រៅ ក្នុងក្រុងបាត់ដំបង
មកពីគណបក្សសង្គ្រោះជាតិ កញ្ញា គឹម លាង បានបង្ហោះសារជាវីដេអូ
នៅលើបណ្ដាញសង្គមហ្វេសប៊ុក កាលពីទី២៥ ខែតុលា នេះសន្យាថា
កញ្ញានឹងមិនលក់ឧត្ដមគតិ ហើយក្បត់ឆន្ទៈរបស់ពលរដ្ឋដើម្បីលាភ សក្ការៈ លុយកាក់
ឬអំណាចនោះឡើយ៖ «ខ្ញុំសុខចិត្តបាត់បង់មុខដំណែង
និងការងារខ្ញុំមិនអាចយកលុយមកសុខស្រួលតែម្នាក់ឯងទេ
នេះជាឃ្លីបវីដេអូរបស់ខ្ញុំ ខ្ញុំនិយាយចេញពីចិត្ត
ខ្ញុំជាមន្ត្រីដែលជាប់ឆ្នោតមកពីគណបក្សសង្គ្រោះជាតិ»។
យ៉ាងណាមិញ ក្រុមប្រឹក្សាឃុំស្ទឹងកាច់
នៅខេត្តប៉ៃលិនម្នាក់មកពីគណបក្សសង្គ្រោះជាតិ លោក ឈុន សិទ្ធី
ត្រូវចាប់ខ្លួនទាំងដីកា និងបញ្ជូនទៅសាលាដំបូងខេត្ត
បន្ទាប់ពីនគរបាលនាំខ្លួនអំពីរឿងបង្ហោះវីដេអូ
ថាមិនចូលជាមួយគណបក្សប្រជាជន។
ករណីមួយទៀតមេឃុំស្រែគរ
ឃុំសេសាន ខេត្តស្ទឹងត្រែង លោក សៀក មេគង្គ ឲ្យដឹងថា
មានមន្ត្រីគណបក្សគណបក្សប្រជាជនកម្ពុជា
និយាយលួងលោមឲ្យរូបលោកទៅចុះចូលជាគណបក្សប្រជាជនកម្ពុជា។
ប៉ុន្តែមេឃុំបក្សប្រឆាំងជាប់ឆ្នោតពីរអាណត្តិរូបនេះ
ថាលោកមិនចាកចោលគណបក្សសង្គ្រោះជាតិនោះទេ។ លោកថា លោកធ្លាប់ក្រ
ធ្លាប់ត្រូវក្រសួងមហាផ្ទៃកាត់ប្រាក់ខែ ដូច្នេះបើនៅពេលខាងមុខ
លោកអស់ការងារទៀតក៏គ្មានអ្វីចំណែកសម្រាប់រូបលោកដែរ៖ «គាត់និយាយ
គាត់ថា នេះជាឱកាសហើយមេគង្គឯងមានតម្លៃ មេគង្គឯងពិចារណាទៅ ខ្ញុំមានឆន្ទៈ
ខ្ញុំចូលរួមជាមួយគណបក្សសង្គ្រោះជាតិជាមនសិការរបស់ខ្ញុំ
ខ្ញុំសុខចិត្តធ្វើស្រែចម្ការធម្មតា»។
អ្នកគាំទ្រគណបក្សសង្គ្រោះជាតិម្នាក់
កញ្ញា ងឹម គាថា ស្នើទៅសមាជិកសភា និងក្រុមប្រឹក្សាគណបក្សសង្គ្រោះជាតិទាំងអស់
ត្រូវរក្សាជំហររបស់ខ្លួនកុំក្បត់ឆន្ទៈម្ចាស់ឆ្នោត៖ «ចំពោះខ្ញុំជាអ្នកគាំទ្រគណបក្សសង្គ្រោះជាតិ
សុំសំណូមពរដល់ពូៗបងៗទាំងអស់សូមរក្សាជំហររបស់ខ្លួនបម្រើប្រជារាស្ត្រ»។
ជោគវាសនារបស់គណបក្សសង្គ្រោះជាតិ
ថា នឹងត្រូវរំលាយ ឬរក្សាទុកនៅដដែល គឺស្ថិតក្នុងតុលាការកំពូល
ព្រោះរដ្ឋាភិបាលបានប្ដឹងរំលាយគណបក្សសង្គ្រោះជាតិចោលតាមសំណើគណបក្សតូចៗពីរដែលគ្មានសំឡេងក្នុងសភា។
នៅពេលនេះដែរ ព្រះមហាក្សត្រ ព្រះករុណា ព្រះបាទសម្ដេច នរោត្ដម សីហមុនី
កាលពីថ្ងៃទី២៥ តុលា បានឡាយព្រះហស្ថដាក់ឲ្យប្រើប្រាស់ច្បាប់ចំនួន៤
ទាក់ទងនឹងការបោះឆ្នោត បន្ទាប់ពីទើបតែវិសោធនកម្មចំនួន៤
ដោយតំណាងរាស្ត្រគណបក្សប្រជាជនកម្ពុជាចំនួន ៦៧រូប បានអនុម័ត
ហើយក្រុមប្រឹក្សាធម្មនុញ្ញបានប្រកាសកាលពីថ្ងៃទី២៤ តុលា ថា
ច្បាប់ទាំងនោះស្របតាមរដ្ឋធម្មនុញ្ញ។ ច្បាប់នេះចែងថា
នៅពេលគណបក្សសង្គ្រោះជាតិត្រូវរំលាយ និងកៅអីរបស់គណបក្សនេះទាំងក្នុងសភា
និងនៅតាមមូលដ្ឋានទៅចែកឲ្យគណបក្សផ្សេង។
ចំណែក
លោកនាយករដ្ឋមន្ត្រី ហ៊ុន សែន ម្ដងហើយម្ដងទៀត បានអំពាវនាវ ទៅមេឃុំ-ចៅសង្កាត់ និងជំទប់ឃុំ-សង្កាត់ របស់គណបក្សសង្គ្រោះជាតិ ឲ្យចុះចូលនឹងលោក
បើពួកគេចង់បានមុខដំណែងរបស់ខ្លួននៅពេលគណបក្សសង្គ្រោះជាតិ
នឹងត្រូវរំលាយចោលក្នុងពេលខាងមុខដ៏ខ្លី។ លោកបន្តថា
គណបក្សកាន់អំណាចនឹងរៀបចំបញ្ជីឈ្មោះសាជាថ្មី ដើម្បីចុះឈ្មោះ មេឃុំ-ចៅសង្កាត់ ឬជំទប់ឃុំ-សង្កាត់
ដែលលាចេញពីគណបក្សសង្គ្រោះជាតិ ចូលក្នុងបញ្ជីឈ្មោះមេឃុំ-ចៅសង្កាត់ និងជំទប់ឃុំ-សង្កាត់របស់គណបក្សប្រជាជនកម្ពុជាវិញ៖ «នៅពេលរលាយកៅអីនឹងជាស្វ័យប្រវត្តបានមកគណបក្សប្រជាជនអ៊ីចឹងទេ
បើគេជាសមាជិកក្រុមប្រឹក្សាខេត្ត ក្រុមប្រឹក្សាស្រុក
យើងឈូសបញ្ជីចូលដាក់ឈ្មោះពួកគាត់ថ្មីទៅ»។
ដំណាលគ្នានេះដែរ
សហគមន៍អន្តរជាតិកំពុងមានចំណាត់ការលើរដ្ឋាភិបាលលោក ហ៊ុន សែន
ដូចទឹកបាក់ទំនប់ សមាជិកព្រឹទ្ធសភាអាមេរិក និងជាអតីតបេក្ខជនប្រធានាធិបតី
មួយរូប បានដាក់ឱសានវាទឲ្យរដ្ឋាភិបាលលោកនាយករដ្ឋមន្ត្រី ហ៊ុន សែន
ត្រឹមថ្ងៃទី៩ ខែវិច្ឆិកា ត្រូវដោះលែងប្រធានគណបក្សសង្គ្រោះជាតិ លោក កឹម
សុខា បើមិនដូច្នេះទេ សហរដ្ឋអាមេរិក នឹងដាក់ទណ្ឌកម្ម
លើមន្ត្រីរដ្ឋាភិបាលមិនឲ្យចូលអាមេរិក។
ចំណែកឯសមាជិកសភាអឺរ៉ុប
និងជាអនុប្រធាន អនុគណៈកម្មាធិការសិទ្ធិមនុស្សសហភាពអឺរ៉ុប អ្នកស្រី បាបារ៉ា
ឡុចប៊ីល័រ (Barbara
Lochbihler) កាលពីថ្ងៃទី២០ តុលា កន្លងទៅនេះ
លើកឡើងថាសហភាពអឺរ៉ុប កំពុងពិចារណាដាក់ទណ្ឌកម្មដោយផ្ទាល់
ឬអាចឈានដល់ការឈប់លើកលែងការអនុគ្រោះ សម្រាប់ការនាំទំនិញកម្ពុជា
ចូលទីផ្សារដ៏ធំរបស់សហភាពអឺរ៉ុបទៀតផង។ រីឯសហភាពអន្តរសភា ហៅកាត់ថា IPU តំណាងឲ្យរដ្ឋសភាមកពី ១៧៣ប្រទេសនៅទូទាំងពិភពលោក
បានអនុម័តសេចក្ដីសម្រេចថ្កោលទោសរដ្ឋាភិបាលកម្ពុជា
ដែលបានធ្វើយុទ្ធនាការធ្វើទុក្ខបុកម្នេញឥតស្រាកស្រាន្ត
មកលើក្រុមតំណាងរាស្ត្រគណបក្សសង្គ្រោះជាតិ
និងប៉ុនប៉ងរំលាយគណបក្សប្រឆាំងធំជាងគេមួយនេះនៅកម្ពុជា។
ហើយនៅចុងក្រោយនេះ
គឺអង្គការសហប្រជាជាតិ
ថាខ្លួនកំពុងសិក្សាលើខ្លឹមសារលិខិតស្នើកោះប្រជុំប្រទេសហត្ថលេខី២៣ តុលា
ដែលសំណើនេះ ធ្វើឡើងដោយអង្គការសង្គមចំនួន
៥៥ស្ថាប័ន។ទាក់ទងការចាកចេញរបស់មន្ត្រីគណបក្សប្រឆាំង និងផែនការរំលាយគណបក្សនេះ
អនុប្រធានគណបក្សសង្គ្រោះជាតិ លោក ប៉ុល ហំម និយាយថា
លោកមិនគ្មានការព្រួយបារម្ភអ្វីដែលចំពោះផែនការរំលាយបក្ស
និងការចុះចូលរបស់សមាជិកសភា សមាជិកក្រុមប្រឹក្សា ខេត្ត ស្រុក ខណ្ឌ និងឃុំ-សង្កាត់របស់គណបក្សសង្គ្រោះជាតិ
ទៅចុះចូលជាមួយគណបក្សប្រជាជនកម្ពុជា។ លោកបន្តថា
អ្នកណាទៅចុះចូលជាមួយគណបក្សកាន់អំណាច
គេជាអ្នកទទួលខុសត្រូវចំពោះម្ចាស់ឆ្នោត និងប្រវត្តិសាស្ត្រ៖ «អត់មានយល់អីទាំងអស់គាត់ចង់បានឲ្យគាត់យកទៅ
ហើយអ្នកណាគេចង់ទៅឲ្យគេទៅចុះ អាណឹងជាសិទ្ធិរបស់គេ
ប៉ុន្តែឆន្ទៈរបស់ប្រជាពលរដ្ឋគឺជារឿងផ្សេង
គាត់ទៅអត់បានយកឆន្ទៈពលរដ្ឋទៅជាមួយទេ»។
សព្វថ្ងៃគណបក្សសង្គ្រោះជាតិ
ដែលមានអ្នកគាំទ្រកន្លះប្រទេស មានតំណាងរាស្ត្រ ៥៥រូប
និងក្រុមប្រឹក្សាខេត្ត ក្រុង ស្រុក ខណ្ឌ និងឃុំសង្កាត់ទូទាំងប្រទេសជិត៦០០០ពាន់នាក់។
ប៉ុន្តែទើបតែមានតំណាងរាស្ត្រនេះមួយរូបនៅមណ្ឌលព្រៃវែង លោក ឡុង ប៊ុន្នី
និងសមាជិកប្រឹក្សា ជាង១០រូប ប៉ុណ្ណោះ
រត់ទៅចុះជាមួយគណបក្សប្រជាជនកម្ពុជាព្រោះខ្លាចបាត់ដំណែង។
ចំនួនបាត់បង់នេះ មិនទាន់ស្មើមួយភាគរយ នៃសមាជិកគណបក្សសង្គ្រោះជាតិទូទាំងប្រទេសនៅឡើយទេ។
អ្នកសិក្សាការអភិវឌ្ឍសង្គមលោកបណ្ឌិត
មាស នី ធ្លាប់លើកឡើងថា គណបក្សនឹងត្រូវរំលាយចោលមុនការបោះឆ្នោតឆ្នាំ២០១៨។
ចំណែកអ្នកនយោបាយជើងចាស់លោកបណ្ឌិត ឡៅ ម៉ុងហៃ ថាបើគណបក្សនេះត្រូវរំលាយមែន
ពលរដ្ឋជាង ៣លាននាក់ដែលគាំទ្រគណបក្សសង្គ្រោះជាតិ នឹងងើបប្រឆាំងតវ៉ា
ដែលធ្វើឲ្យរដ្ឋាភិបាលលោក ហ៊ុន សែន ជួបវិបត្តិទាំងក្នុងស្រុក
និងការដាក់ទណ្ឌកម្មពីអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ
យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/