លោក សម រង្ស៊ី លើកឡើងថា “ការកម្ទេចឆន្ទៈរាស្ត្រខ្មែរជាង៣លាននាក់នៅពេលនេះ ប្រៀបដូចពួកខ្មែរក្រហមកម្ទេចជីវិតរាស្ត្រខ្មែររាប់លាននាក់អញ្ចឹងដែរ”

(ប៉ារីស) ៖ លោក សម រង្ស៊ី អតីតប្រធានគណបក្សសង្គ្រោះជាតិ និងជាបិតាស្ថាបនិក នៃ “សមាគម ដើម្បីលើកតម្កើងលទ្ធិប្រជាធិបតេយ្យ នៅកម្ពុជា” លើកឡើងថា គម្រោងរបស់គណបក្សប្រជាជនកម្ពុជាដែលចង់រំលាយគណបក្សសង្គ្រោះជាតិ ជាការបង្ហាញពីភាពភ័យខ្លាច និងស្លន់ស្លោររបស់គណបក្សប្រជាជនកម្ពុជា ដែលដឹងច្បាស់ថាខ្លួននឹងចាញ់គណបក្សសង្គ្រោះជាតិក្នុងការបោះឆ្នោតផ្ដាច់ព្រ័តក្នុងឆ្នាំ២០១៨ ខាងមុខ។

លោក សម រង្ស៊ី បានសង្កត់ធ្ងន់ថា ការរំលាយគណបក្សសង្គ្រោះជាតិ គឺជាការកម្ទេចឆន្ទៈប្រជារាស្ត្រខ្មែរជាង៣លាននាក់ ប្រៀបដូចសម័យប៉ុលពត ដែលពួកខ្មែរក្រហមមិនញញើតកម្ទេចជីវិតប្រជារាស្ត្រខ្មែររាប់លាននាក់អញ្ចឹងដែរ។

គួរបញ្ជាក់ផងដែរថា នាពេលថ្មីៗនេះ លោក សម រង្ស៊ីបានពិភាក្សាជាមួួយតំណាងរាស្ត្រ និងសមាជិកព្រឹទ្ធសភានៅប្រទេសជាច្រើនទូទាំងពិភពលោក អំពីគម្រោងចង់រំលាយគណបក្សសង្គ្រោះជាតិពីសំណាក់គណបក្សប្រជាជនកម្ពុជា។ ដោយឡែក អ្នកធ្វើច្បាប់ និងអ្នកច្បាប់ទាំងអស់ក្នុងពិភពលោក គេហួសចិត្ត និងអស់សំណើចចំពោះទង្វើរបស់គណបក្សប្រជាជនកម្ពុជាដែលចង់រំលាយគណបក្សសង្គ្រោះជាតិ នៅពេលមួយដែលការបោះឆ្នោតផ្ដាច់ព្រ័តក្នុងឆ្នាំ២០១៨ កាន់តែឈានជិតមកដល់នេះ៕