ចៅសង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ មកពីគណបក្សសង្គ្រោះជាតិ ចោទប្រកាន់អាជ្ញាធរក្រុង និងអាជ្ញាធរខេត្តនេះថា រឹតត្បិតការងារមកលើមន្ត្រីបក្សប្រឆាំង ធ្វើឲ្យរាំងស្ទះដល់ការធ្វើលិខិតបញ្ជាក់ផ្សេងៗ ជូនប្រជាពលរដ្ឋដើម្បីឲ្យពួកគាត់ចុះឈ្មោះបោះឆ្នោត។ ប៉ុន្តែ ស្មៀនសង្កាត់ផ្សារកណ្ដាល អះអាងថា ការលើកឡើងនេះ ជារឿងមិនពិតឡើយ។
ចៅសង្កាត់ផ្សារកណ្ដាល គណបក្សសង្គ្រោះជាតិ លើកឡើងថា ប្រសិនបើមន្ត្រីថ្នាក់លើមិនរឹតត្បិតការងាររបស់ខ្លួនទេ គឺអាចជួយធ្វើលិខិតបញ្ជាក់ជូនពលរដ្ឋ សម្រាប់យកទៅចុះឈ្មោះបោះឆ្នោតបានច្រើនជាមិនខាន។
អ្នកស្រី ឃុន ចន្ទី ឲ្យដឹងនៅថ្ងៃទី១០ តុលា ថា អ្នកស្រីខំប្រឹងធ្វើយ៉ាងការយ៉ាងណា ក៏មិនត្រូវចិត្តអាជ្ញាធរ ក្រុងប៉ោយប៉ែត និងអាជ្ញាធរខេត្តបន្ទាយមានជ័យ បានដែរ។ ស្ត្រីចៅសង្កាត់បក្សប្រឆាំងរូបនេះ ថា ការងារដែលអាជ្ញាធរថ្នាក់លើចង្អៀតចង្អល់ចិត្តខ្លាំង គឺការធ្វើលិខិតបញ្ជាក់ជូនពលរដ្ឋដើម្បីយកទៅចុះឈ្មោះបោះឆ្នោតតែម្ដង។
អ្នកស្រីសង្កត់ធ្ងន់ទៀតថា បញ្ហាទាំងនេះ កើតឡើងតាមរយៈស្មៀនសង្កាត់ផ្សារកណ្ដាលរាយការណ៍ទៅមន្ត្រីថ្នាក់លើ ហើយមន្ត្រីទាំងនោះ តែងចុះមកចាប់កំហុស និងស្ដីបន្ទោសអ្នកស្រីជាបន្តបន្ទាប់ បើទោះជាខ្លួនធ្វើត្រឹមត្រូវយ៉ាងណាក៏ដោយ។
ឆ្លើយតបនឹងបញ្ហានេះ ស្មៀនសង្កាត់ផ្សារកណ្ដាល លោក សេង ប៊ុនធឿន មានប្រសាសន៍ថា ពុំមានមន្ត្រីណារឹតត្បិតការងាររបស់ចៅសង្កាត់នោះទេ គឺអ្នកស្រីចៅសង្កាត់ទៅវិញទេ ដែលមិនចេះធ្វើការ និងមិនសូវស្ដាប់បញ្ជារបស់មន្ត្រីថ្នាក់លើនោះ។
ទោះជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្ត បន្ទាយមានជ័យលោក ស៊ុំ ច័ន្ទគា មានប្រសាសន៍ថា ការរឹតត្បិតការងាររបស់ចៅសង្កាត់គណបក្សប្រឆាំងពុំមែនជាដំណោះស្រាយ ដើម្បីការអភិវឌ្ឍរីកចំរើននៅក្នុងមូលដ្ឋាននោះទេ។ លោកថា ផ្ទុយទៅវិញ បញ្ហានេះនឹងធ្វើឲ្យការអភិវឌ្ឍដើរថយក្រោយ។
ស្ត្រីចៅសង្កាត់បក្សប្រឆាំង កាលពីខែកញ្ញាកន្លងទៅធ្លាប់ដើរចេញពីអង្គប្រជុំ នៅក្នុងសាលាក្រុងប៉ោយប៉ែតម្ដងរួចទៅហើយ ដោយកាលណោះអ្នកស្រីមិនពេញនឹងអភិបាលក្រុង ដែលមិនផ្ដល់ឱកាសឲ្យខ្លួនបានឡើងសម្ដែងមតិ ដើម្បីបង្ហាញពីទុក្ខលំបាករបស់ប្រជាពលរដ្ឋ ដើម្បីរួមគ្នាដោះស្រាយជួនពួកគាត់។ ក្រោយមកទៀត នៅថ្ងៃទី២៨ កញ្ញា មន្ត្រីរដ្ឋបាលសាលាខេត្តបន្ទាយមានជ័យ ក៏បានចុះទៅពិនិត្យមើលការងារផ្ទាល់របស់ចៅសង្កាត់រូបនេះ ហើយថែមទាំងបានស្ដីបន្ទោសអ្នកស្រីថា ធ្វើការមិនស្ដាប់បង្គាប់ថ្នាក់លើ៕
ចៅសង្កាត់បក្សប្រឆាំងក្រុងប៉ោយប៉ែតត្អូញត្អែរពីអាជ្ញាធររឹតត្បិតការបញ្ជាក់លិខិតជូនពលរដ្ឋ
ReplyDelete