កាលពីថ្ងៃទី០៩ ខែតុលា ឆ្នាំ២០១៧ម្សិលមិញនេះ លោកស្រី សែម សក្តិកូឡា ចៅក្រមទទួលបញ្ជានៃតុលាការកំពូលដែលមានឯកឧត្តម ឌិត មុន្ទី សមាជិកគណៈអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជាជាប្រធាន បានចេញដីកាបង្គាប់ឲ្យប្រធានគណបក្សសង្គ្រោះជាតិ (CNRP) ដាក់ឯកសារត្រៀមឆ្លើយតបទៅនឹងពាក្យបណ្តឹងសុំរំលាយគណបក្សសង្គ្រោះជាតិចុះថ្ងៃទី០៦ ខែតុលា ឆ្នាំ២០១៧របស់ក្រសួងមហាផ្ទៃ តំណាងសិទ្ធិឲ្យក្រុមេធាវីចំនួន៥នាក់ មកតុលាការកំពូលក្នុងរយៈពេល២០ថ្ងៃគិតចាប់ពីថ្ងៃបានទទួលដីកាបង្គាប់ ។
ដីកាបង្គាប់របស់តុលាការកំពូលដែលឲ្យប្រធានគណបក្សសង្គ្រោះជាតិដាក់ឯកសារត្រៀមឆ្លើយតបទៅនឹងពាក្យបណ្តឹងរបស់ក្រសួងមហាផ្ទៃសុំរំលាយគណបក្សសង្គ្រោះជាតិនេះ គឺខណៈពេលដែលឯកឧត្តម កឹម សុខា ប្រធានគណបក្សសង្គ្រោះជាតិ និងជាអ្នកតំណាងរាស្ត្រមណ្ឌលខេត្តកំពង់ចាម ជាប់ឈ្មោះជាជនត្រូវចោទ និងកំពុងជាប់ឃុំខ្លួនបណ្តោះអាសន្តនៅពន្ធនាគារត្រពាំងផ្លុង ខេត្តត្បូងឃ្មុំ នៅឡើយ ។
គួររំលឹកជូនថា កាលពីថ្ងៃទី០២ ខែតុលា ឆ្នាំ២០១៧កន្លងទៅថ្មីៗក្រុមមេធាវីតំណាងដោយអាណត្តិឲ្យក្រសួងមហាផ្ទៃបានដាក់ពាក្យបណ្តឹងសុំរំលាយគណបក្សសង្គ្រោះជាតិទៅតុលាការកំពូល បង្កើតបានជាសំណុំរឿងរដ្ឋប្បវេណីលេខ១០គ.ប ចុះថ្ងៃទី០៦ ខែតុលា ឆ្នាំ២០១៧របស់តុលាការកំពូល ហើយក៏ត្រូវបានតុលាការកំពូលចាត់ការយ៉ាងរួសរាន់មិនបង្អង់ដៃ ។
ការប្តឹងសុំរំលាយគណបក្សសង្គ្រោះជាតិរបស់ក្រសួងមហាផ្ទៃទៅតុលាការកំពូល គឺកើតឡើងបន្ទាប់ពីមានការចាប់ និងឃុំខ្លួនឯកឧត្តម កឹម សុខា ប្រធានគណបក្សសង្គ្រោះជាតិ និងជាអ្នកតំណាងរាស្ត្រមណ្ឌលខេត្តកំពង់ចាមដាក់ពន្ធនាគារទាំងជាប់អភ័យឯកសិទ្ធិសភា នាថ្ងៃទី០៣ ខែកញ្ញា ឆ្នាំ២០១៧ ក្រោមការចោទប្រកាន់ពីបទសន្ទិដ្ឋិភាពជាមួយបរទេស និងបន្ទាប់ពីមានការដាក់ពាក្យបណ្តឹងរបស់គណបក្សហ្វ៊ុនស៊ិនប៉ិច និងគណបក្សយុវជនកម្ពុជា ដែលជាគណបក្សនយោបាយដង្ហែគាំទ្រគណបក្សប្រជាជនកម្ពុជាទៅក្រសួងមហាផ្ទៃរួចមក ៕
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/