ស្ទឹងត្រែងៈ លោកនាយករដ្ឋមន្ត្រី ហ៊ុន សែន បានវាយប្រហារធ្ងន់ៗលើអ្នកវិភាគម្នាក់ដោយលោកចាត់ទុកថាគ្មានសមត្ថភាពស្មើនឹងកូនប្រុសទាំង ៣ របស់លោក និងប្រាប់ឲ្យអ្នកវិភាគសិក្សារដ្ឋធម្មនុញ្ញបន្ថែមមុនពេលវិភាគលើការអត្ថាធិប្បាយរបស់លោក ជាអ្វីដែលអ្នកវិភាគម្នាក់ថាមានគំនិតចង្អៀតចង្អល់។
ថ្លែងក្នុងឱកាសចូលរួមពិធីបិទទ្វារទឹកទំនប់វារីអគ្គិសនីសេសានក្រោម ២ ក្នុងខេត្តស្ទឹងត្រែងកាលពីម្សិលមិញលោក ហ៊ុន សែន បានប្រតិកម្មខ្លាំងៗលើអ្នកវិភាគដែលលោកថាអ្នកវិភាគនោះហ៊ានប្រដៅលោកហើយបានជំរុញឲ្យអ្នកវិភាគដែលលោកមិនបានបញ្ចេញឈ្មោះទៅសិក្សារដ្ឋធម្មនុញ្ញឲ្យបានច្បាស់សិនមុនមកប្រដៅលោក។
ការថ្លែងនេះកើតឡើងប៉ុន្មានថ្ងៃក្រោយប្រតិកម្មរបស់លោកទៅនឹងការរិះគន់ពីសំណាក់ស្ថានទូតសហរដ្ឋអាមេរិកប្រចាំរាជធានីភ្នំពេញដែលលោកថា អ្នកវិភាគខ្លះឲ្យលោកប្រជុំសភាជាមុនសិនមុនធ្វើការឆ្លើយតប។
លោកថា៖ «ក្នុងករណីគេឈ្លានពានកុំថាឡើយដល់ទៅ [ប្រជុំសភា] បើគេឈ្លានពានអត់មានត្រូវការប្រជុំសភាផ្អាកការប្រជុំសភាទាំងអស់គ្មានត្រូវការប្រជុំសភាទេ។»
លោកបន្ថែមថា៖ «វាមិនដែលម៉ែអាណាគ្រាន់តែទៅប្រតិកម្មជាមួយនឹងបរទេសជ្រែកចូលកិច្ចការផ្ទៃក្នុងខ្មែរ ហើយឲ្យទៅសុំសភា។ វាមិនដែល»។
ដោយប្រៀបធៀបពីសមត្ថភាពកូនប្រុសទាំង ៣ របស់លោកគឺលោក ហ៊ុន ម៉ាណែត ដែលមានសញ្ញាបត្របណ្ឌិតផ្នែកយោធា និងមានតួនាទីជានាយរងសេនាធិការចម្រុះនៃកងយោធពលខេមរភូមិន្ទលោក ហ៊ុន ម៉ានី ដែលជាតំណាងរាស្ត្រ និង ហ៊ុន ម៉ានិត ជាអគ្គនាយកចារកម្មទៅនឹងអ្នកវិភាគ លោក ហ៊ុន សែន ថ្លែងថាពួកគេគ្មានសមត្ថភាពស្មើនឹងកូនប្រុសលោកដែលបានទទួលសញ្ញាបត្រខាងយោធាទេ។
លោកថា៖ «អស់លោកសមត្ថភាពប៉ុនលោកមិនបានស្មើនឹងកូនរបស់ខ្ញុំទេ។ បណ្ឌិតរបស់អស់លោកមិនបានស្មើកូនរបស់ខ្ញុំទេ ខ្ញុំសុំប្រដៅ។ អស់លោកពូកែហើយ តែលោកមិនមានបណ្ឌិតខាងយោធាទេខុសគ្នាកន្លែងនេះ…។ កុំមកលេងជាមួយ ហ៊ុន សែន ដែលជាឪពុកនោះលេងត្រឹមតែកូនខ្ញុំរើសទៅកូនប្រុស ៣ នាក់រើសមួយណាក៏បានដែរខ្លួនលេងតទល់ទៅជាមួយកូនប្រុសរបស់ខ្ញុំ»។
លោកនាយករដ្ឋមន្ត្រីបន្ថែមថាអ្នកវិភាគទាំងនោះ «កំពុងតែធ្វើខុស» ដោយបានបកស្រាយលើសសិទ្ធិផ្ដាច់មុខរបស់ក្រុមប្រឹក្សាធម្មនុញ្ញ។
លោកថ្លែងបែបចំអកថា៖ «ឱ! អ្នកវិភាគហើយ ហើយបណ្ឌិតទៀតខ្លួនឯងជាអ្នកវិភាគ ធ្វើជាអ្នកច្បាប់ ប៉ុន្តែហ៊ានបកស្រាយរដ្ឋធម្មនុញ្ញដែលជាសិទ្ធិផ្ដាច់មុខរបស់ក្រុមប្រឹក្សាធម្មនុញ្ញទៅវិញ។ អ៊ឹចឹងខ្លួនឯងជាអ្វីទៅ? កំពុងតែធ្វើខុស ហើយខ្លួនឯងចាត់ទុកជាអ្នកត្រឹមត្រូវ។ ការបកស្រាយរដ្ឋធម្មនុញ្ញគឺជាសិទ្ធិរបស់ក្រុមប្រឹក្សាធម្មនុញ្ញមិនមែនជាសិទិ្ធអ្នកវិភាគទេ»។
ដោយហាក់ចាត់ទុកថាមពលលោកនៅរឹងមាំ និងជ័យជម្នះក្នុងការបោះឆ្នោត លោក ហ៊ុន សែន បានអះអាងថាលោកនឹងនៅបន្តដឹកនាំប្រទេសសម្រាប់អាណត្តិក្រោយៗទៀតដោយគ្មានបញ្ហា។
លោកថា៖ «ខ្ញុំជឿជាក់លើខ្លួនឯងថាយ៉ាងតិចណាស់ខ្ញុំរស់នៅបាន ៣០ ឆ្នាំទៀតដែរ។ អ៊ីចឹងការបន្តធ្វើនាយករដ្ឋមន្ត្រី ១០ ឆ្នាំទៀតមិនមែនជាបញ្ហាលំបាកសម្រាប់ខ្ញុំទេ»។
អ្នកវិភាគនយោបាយលោកបណ្ឌិត ឡៅ ម៉ុងហៃ លើកឡើងថាលោកមិនដឹងថាលោកនាយករដ្ឋមន្ត្រីថ្លែងសំដៅលើអ្នកវិភាគរូបណានោះទេ តែថាការអត្ថាធិប្បាយគឺ «សិទ្ធិបញ្ចេញមតិ» របស់អ្នកវិភាគម្នាក់ៗ។
លោកថា៖ «គេជាអ្នកចេះដឹងអ្នកខ្វល់ខ្វាយដែលបានចូលរួមចំណែកក្នុងការបកស្រាយ»។
លោកបានហៅការអត្ថាធិប្បាយរបស់លោក ហ៊ុន សែន ថាមានគំនិត «ចង្អៀតចង្អល់» និងមានអំនួតលើកូនប្រុសរបស់ខ្លួន ហើយថារាល់ព្រឹត្តិការណ៍ធំៗរបស់ជាតិរដ្ឋាភិបាលគួររាយការណ៍ជូនសភាជាតិជាមុន។
លោកបានថ្លែងបន្តថា៖ «បើសិនជាមានព្រឹត្តិការណ៍ធំៗ អ៊ីចឹងគេឲ្យជម្រាបសភាជាតិឲ្យដឹង…ការជម្រាបទៅសភាគឺធ្វើតាមរយៈការជម្រាបរាយការណ៍»៕
រាយការណ៍បន្ថែមៈ ម៉ិច ដារ៉ា
Contact author: បែន សុខហ៊ាន
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/