រដ្ឋសភានឹងបើកសម័យប្រជុំលើកទី៩ នៅថ្ងៃទី១២ តុលា ដែលមានរបៀបវារៈ មួយចំនួន ដើម្បីពិភាក្សា។ ក៏ប៉ុន្តែ មកទល់ពេលនេះ ក្រុមតំណាងរាស្ត្របក្សប្រឆាំងមិនទាន់សម្រេចចិត្ត ថា នឹងចូលប្រជុំឬយ៉ាងណានៅឡើយ ដោយសារតែមេបក្សរបស់ខ្លួនត្រូវបានរដ្ឋាភិបាលចាប់ខ្លួន និងតំណាងរាស្ត្រមួយចំនួនទៀត កំពុងជាប់ឃុំ និងភៀសខ្លួននោះ។
មន្ត្រីជាន់ខ្ពស់គណបក្សប្រឆាំងរួបនេះ ឲ្យដឹងកាលពីថ្ងៃទី៩ តុលា ថា គណៈកម្មាធិការអចិន្ត្រៃយ៍ នឹងប្រជុំ នៅព្រឹកថ្ងៃទី១០ តុលា ដើម្បីសម្រេចថា នឹងចូលរួមប្រជុំ ឬមិនចូល នៅខណៈមេបក្សរបស់ខ្លួន ត្រូវបានរដ្ឋាភិបាលចាប់ យកទៅឃុំខ្លួននោះ។
អគ្គលេខាធិការដ្ឋានរដ្ឋសភា បានចេញលិខិតជូនដំណឹងថា សភានឹងបើកសម័យប្រជុំលើកទី៩ នីតិកាលទី៥ ដែលនឹងពិភាក្សានិងអនុម័តលើរបៀបវារៈចំនួន៥ រួមមាន ព្រះមហាក្សត្រ នរោត្តម សីហមុនី ជូនសម័យប្រជុំរដ្ឋសភានីតិកាលទី៥។ របាយការណ៍ស្ដីពីសកម្មភាពរបស់រដ្ឋសភាចន្លោះ សម័យប្រជុំរដ្ឋសភាលើកទី៨ និងលើកទី៩ នីតិកាលទី៥ និងរបៀបវារៈមួយចំនួនទៀត។
អ្នកវិភាគឯករាជ្យលោកបណ្ឌិត ឡៅ ម៉ុងហៃ មានប្រសាសន៍ថា ស្ថានភាពនយោបាយសព្វថ្ងៃនេះ គឺធ្វើឲ្យគណបក្សប្រឆាំងពិបាកនឹងសម្រេចចិត្តថា ត្រូវចូលរួម ឬមិនចូលរួមប្រជុំសភា ពីព្រោះថា មេបក្សរបស់ខ្លួនត្រូវបានគេចាប់ខ្លួន ហើយកំពុងប្រឈមនឹងបក្សតូចពីរទៀតប្ដឹងរំលាយនោះ។ តែលោកបញ្ជាក់ថា បើសិនជាតំណាងរាស្ត្របក្សប្រឆាំងចូលប្រជុំនោះ ក៏ជាឱកាសល្អដែរ ធ្វើសិទ្ធិរបស់ខ្លួនសួរនាំអំពីការធ្វើទុក្ខបុកម្នេញបក្សប្រឆាំង ឬការចាប់ខ្លួនមេបក្សរបស់ខ្លួនជាដើម។
សហភាពអឺរ៉ុបបានចេញសេចក្ដីថ្លែងការណ៍មួយថ្មីទៀតកាលពីថ្ងៃទី៩ តុលា ដោយអំពាវនាវឲ្យរដ្ឋាភិបាលកម្ពុជាពិចារណាឡើងវិញ ចំពោះការធ្វើទុក្ខបុកម្នេញគណបក្សប្រឆាំងនេះ ពីព្រោះថា គណបក្សនេះ ជាគណបក្សដែលទទួលបានសំឡេងបោះឆ្នោតជ្រើសរើសក្រុមប្រឹក្សាឃុំ-សង្កាត់តាម បែបប្រជាធិបតេយ្យសេរីពហុបក្សនោះ មានអ្នកគាំទ្រជាង៤០% ដែរ។
សហភាពអឺរ៉ុបនៅតែព្រួយបារម្ភដែលបានចេញសេចក្ដីថ្លែងការណ៍កាលពីពេលថ្មីៗដែរ ចំពោះការវិវឌ្ឍនយោបាយ នាពេលបច្ចុប្បន្នស្ថិតនៅក្នុងភាពគ្រោះថ្នាក់ ពិសេសការចាប់ខ្លួនមេដឹកនាំបក្សប្រឆាំង ហើយអាជ្ញាធរកម្ពុជាចាត់ចែង ដើម្បីស្វែងរកការរំលាយគណបក្សប្រឆាំង ដែលនឹងធ្វើឲ្យប៉ះពាល់ដល់ដំណើរការបោះឆ្នោត។
នៅក្នុងសេចក្ដីថ្លែងការណ៍របស់សភាពអឺរ៉ុប កាលពីខែកញ្ញា អំពាវនាវឲ្យអាជ្ញាធរកម្ពុជាត្រូវគោរពសិទ្ធិជំនុំជម្រះ ដោយស្មើភាពចំពោះពលរដ្ឋកម្ពុជាគ្រប់រូប និងចំពោះអង្គការទាំងឡាយដែលកំពុងបំពេញការងារនៅកម្ពុជា ហើយដោយយោងទៅលើអភ័យឯកសិទ្ធិសភា អាជ្ញាធរត្រូវដោះលែងលោក កឹម សុខា ជាបន្ទាន់។
សេចក្ដីថ្លែងការណ៍ដដែលបន្តថា ដំណើរការប្រជាធិបតេយ្យឆ្ពោះទៅរកការបោះឆ្នោតជ្រើសតាំងតំណាងរាស្ត្រនៅខែកក្កដា ឆ្នាំ២០១៨ ខាងមុខ ដ៏គួរឱ្យទុកចិត្តបាននោះ គឺចាំបាច់ត្រូវតែមានបរិយាកាសមួយដែលគ្រប់គណបក្សនយោបាយ អង្គការសង្គមស៊ីវិល និងប្រព័ន្ធផ្សព្វផ្សាយ អាចបន្តបំពេញតួនាទីស្របតាមច្បាប់របស់ពួកគេ ដោយគ្មានការភ័យខ្លាច ការគំរាមកំហែង និងគ្មានការរឹតបន្តឹងតាមតែអំពើចិត្តនោះទេ។ ហើយសហភាពអឺរ៉ុបត្រៀមខ្លួនរួចជាស្រេច ដើម្បីបន្តជួយកម្ពុជាក្នុងបញ្ហានេះ។
នៅមុនពេល គណបក្សតូចៗពីរដាក់ពាក្យប្ដឹងរំលាយគណបក្សប្រឆាំងកាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន ព្រមានកាលពីថ្ងៃទី១១ កញ្ញាថា គ្មានពេលវេលាទុកឲ្យបក្សប្រឆាំងដំណើរការទៀតទេ បើនៅតែបន្តការពារលោក កឹម សុខា ដែលលោកចោទថា ក្បត់ជាតិ។
ចំណែកអង្គការធំៗពីរ គឺអង្គការឃ្លាំមើលពិភពលោក គ្លូបល វីនេស (Global Witness) និងអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) កំពុងរួមគ្នាថ្កោលទោសរដ្ឋាភិបាលលោក ហ៊ុន សែន និង ស្នើឲ្យពិភពលោកដាក់ទណ្ឌកម្មសេដ្ឋកិច្ច និងកាច់ផ្ដាច់ជំនួយផ្នែកហិរញ្ញវត្ថុ និងជំនួយបច្ចេកទេសផ្សេង ដើម្បីបង្ខំឲ្យរដ្ឋាភិបាល បញ្ឈប់ការប៉ុនប៉ងរំលាយគណបក្សប្រឆាំង។
ទោះបីជាយ៉ាងនេះក្ដី អ្នកឃ្លាំមើលការបោះឆ្នោតលើកឡើងថា តំណាងរាស្ត្របក្សប្រឆាំងមិនត្រូវចូលប្រជុំសភាឡើយ ពីព្រោះថា បើសិនសមាជិកសភាបក្សប្រឆាំងចូលប្រជុំសភា ប្រៀបដូចជាទៅបំពេញភាពស្របច្បាប់ ដល់រដ្ឋាភិបាលបច្ចុប្បន្ន ដែលសហគមន៍អន្តរជាតិកំពុងតែថ្កោលទោស។
ម្យ៉ាងវិញទៀត គណបក្សប្រឆាំងត្រូវហ៊ានប្រឈមនិងការដាក់ពិន័យរបស់រដ្ឋសភា ដូចជាការកាត់ប្រាក់ខែជាដើម បើសិនជាតំណាងរាស្ត្របច្ចុប្បន្ន មិនព្រមបញ្ឈប់ធ្វើទុក្ខបុកម្នេញបក្សប្រឆាំងក្រោមហេតុផលអនុវត្តច្បាប់នេះ៕
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/