ថ្ងៃទី២៩ ខែតុលា ឆ្នាំ២០១៧ គឺជាខួប១៣ឆ្នាំ
នៃការសោយរាជ្យបល្ល័ង្ករបស់ព្រះមហាក្សត្រ សម្តេចព្រះ បរមនាថ នរោត្តម សីហមុនី។
ពលរដ្ឋ និងយុវជន មើលឃើញពីភាពរីកចម្រើន និងភាពសុខសាន្ដរបស់កម្ពុជា
នៅក្នុងរជ្ជកាលរបស់ព្រះបាទនរោត្តម សីហមុនី
ប៉ុន្តែពួកគេស្នើព្រះអង្គចូលរួមព្រះរាជសកម្មភាពនៅក្នុងសង្គមបន្ថែមទៀត។
យុវជនកាយរឹទ្ធិរាជធានីភ្នំពេញម្នាក់ ឈ្មោះ
ឡុង ច័ន្ទដេវីត យល់ថា
ប្រសិនបើព្រះមហាក្សត្រចូលរួមព្រះរាជសកម្មភាពការពារព្រៃឈើ ដូចជាព្រៃឡង់
អារ៉ែង ជាមួយពលរដ្ឋក្នុងសហគមន៍ព្រៃឈើ
នោះនឹងធ្វើឲ្យការកាប់បំផ្លាញព្រៃឈើ ត្រូវបានថមថយ។
ចំណែកយុវតីម្នាក់ទៀត
គឺជាសិស្សថ្នាក់ទី១២ នៃវិទ្យាល័យទួលទំពូង កញ្ញា ឡាយ ស្រីពេជ្រ
ចង់ឃើញព្រះមហាក្សត្រចូលរួមនៅក្នុងសកម្មភាពយុវជន។ ស្រីពេជ្រ មើលឃើញថា
ព្រះរាជសកម្មភាព ព្រះមហាក្សត្របានចូលរួមច្រើន ក្នុងសកម្មភាពមនុស្សធម៌
ជាមួយមនុស្សវ័យចំណាស់។ សិស្សថ្នាក់ទី១២រូបនេះ ក៏ចង់ឃើញព្រះអង្គ
ចូលរួមជាមួយក្រុមយុវជនផងដែរ។
យុវជនម្នាក់ទៀត
គឺជានិស្សិតនៃសាកវិទ្យាល័យឯកជនមួយ នៅក្រុងភ្នំពេញ
ស្នើឲ្យព្រះមហាក្សត្របន្តព្រះរាជសកម្មភាពរបស់ព្រះអង្គសព្វថ្ងៃនៅក្នុងសង្គម។
ថ្វីបើតួនាទី និងសិទ្ធិអំណាចរបស់ព្រះអង្គ នៅក្នុងឆាកនយោបាយ
ត្រូវបានរឹតត្បិតដោយច្បាប់ ប៉ុន្តែយុវជនរូបនេះ
ចង់ឃើញព្រះរាជសកម្មភាពមនុស្សធម៏ និងកិច្ចការក្នុងសង្គមឲ្យបានច្រើន។
បុរសម្នាក់ ជាពលរដ្ឋរស់នៅរាជធានីភ្នំពេញ
ឈ្មោះ ឡា វាញ ចង់ឃើញព្រះមហាក្សត្របច្ចុប្បន្នប្រឡូកសកម្មភាពមនុស្សធម៌ឲ្យបានផុលផុស
ដូចព្រះបរមរតនកោដ្ឋ
ដែលបន្សល់ទុកស្នាព្រះហស្ថមនុស្សធម៌ជាច្រើននៅក្នុងសង្គម។
ឯពលរដ្ឋរស់នៅរាជធានីភ្នំពេញម្នាក់ទៀត
អ្នកស្រី ផាយ សារ៉េត យល់ថា ព្រះមហាក្សត្រ នរោត្តម សីហមុនី
បានចូលរួមគ្រប់វិស័យទាំងអស់នៅក្នុងសង្គម។ អ្នកស្រី
តែងតែឃើញព្រះភក្ត្ររបស់ព្រះអង្គ នៅជាមួយពលរដ្ឋជួបការលំបាក។ អ្នកស្រី
សារ៉េត អះអាងថា ព្រះមហាក្សត្រ នរោត្តម សីហមុនី
តែងតែចូលរួមនៅក្នុងសកម្មភាពដាំកូនឈើរាល់ឆ្នាំ។
ចំណែកសកម្មភាពមនុស្សធម៌ដទៃទៀត
ពលរដ្ឋយល់ថា ព្រះមហាក្សត្រ អាចមានលទ្ធភាពសុំជំនួយមនុស្សធម៌ផ្នែកការអប់រំ
កសិកម្ម សុខាភិបាល ជាដើម
ដើម្បីជួយបំពេញបន្ថែមសម្រាប់ការកង្វះខាតក្នុងវិស័យទាំងនេះ។
កន្លងមក គេសង្កេតឃើញថា
មានស្នាព្រះហស្ថក្នុងរាជ្យ របស់ព្រះអង្គដែលជាស្នាព្រះហស្ថធំៗដូចជា
អគារព្យាបាលមនុស្សចាស់ជរា នរោត្តម សីហនុ
ដែលស្ថិតនៅក្នុងបរិវេណមន្ទីរពេទ្យមិត្តភាពកម្ពុជារុស្ស៊ី (រុស្សី) រាជធានីភ្នំពេញ។
អគារមនុស្សចាស់ជរានេះ គឺព្រះអង្គ ស្ថាបនាដើម្បីរំលឹកដល់ព្រះបិតាព្រះអង្គ
គឺព្រះបាទនរោត្តម សីហនុ។ មួយទៀត គឺ ពុទ្ធិកសាកលវិទ្យាល័យព្រះសីហមុនីរាជា
ដែលស្ថិតក្នុងបរិវេណវត្តស្វាយពពែ រាជធានីភ្នំពេញ។
ពុទ្ធិកសាកលវិទ្យាល័យព្រះសីហមុនីរាជា
គឺជាគ្រឹះស្ថានអប់រំសម្រាប់ទទួលសិស្សក្រីក្រ ទូទាំងប្រទេស
ដែលបញ្ចប់ការសិក្សានៅទុតិយភូមិ ឬ បាក់ឌុប។ ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហមុនី
គឺ សម្ដេចព្រះសង្ឃរាជ បួ គ្រី និងជាព្រះរាជគ្រូ របស់ព្រះបាទនរោត្តម សីហមុនី
ធ្លាប់មានព្រះរាជបន្ទូលថា កូនខ្មែរក្រីក្រគ្រប់សាសនា
សុទ្ធតែអាចចូលរៀនពុទ្ធិកសាកលវិទ្យាល័យព្រះសីហមុនីបាន។
អតីតនិស្សិតច្បាប់ នៃពុទ្ធិកសាកលវិទ្យាល័យព្រះសីហមុនីរាជា
លោក ឡេង សេងហុង ដែលបច្ចុប្បន្នជា ប្រធានសមាគមនិស្សិតបញ្ញវន្តកម្ពុជា
អះអាងថា គុណភាពនៃការអប់រំរបស់ពុទ្ធិកសាកលវិទ្យាល័យព្រះសីហមុនីរាជា
នៅមានកម្រិត ប៉ុន្តែទទួលយកបានសម្រាប់និស្សិតក្រីក្រ។ លោកបានថ្លែងអំណរគុណចំពោះព្រះមហាក្សត្រ
សីហមុនី ដែលបង្កើតពុទ្ធិកសាកលវិទ្យាល័យសម្រាប់និស្សិតក្រីក្របានចូលរៀន។
តាមសៀវភៅ ដែលមានចំណងជើងថា អំណាច
និងរាជបល្ល័ង្កនៃមហាក្សត្រខ្មែរ សែអង្គឌួង នរោត្តម ស៊ីសុវត្ថិ របស់ លោក ឆាយ
សុផល នៅទំព័រ៣១៧ អះអាងថា នៅថ្ងៃទី១៤ ខែតុលា ឆ្នាំ២០០៤ ព្រះបាទនរោត្តម
សីហមុនី ត្រូវបានសមាជិកក្រុមប្រឹក្សារាជបល្ល័ងបានសម្រេចជ្រើសរើសព្រះអង្គ
ឲ្យឡើងគ្រងរាជ្យបន្តពីព្រះបិតា។ កាលនោះព្រះអង្គមានព្រះជន្ម ៥១ព្រះវស្សា។
មន្ត្រីអង្កេតជាន់ខ្ពស់ផ្នែកសិទ្ធិដីធ្លី
និងធនធានធម្មជាតិ នៃសមាគមសិទ្ធិមនុស្សអាដហុក (Adhoc) លោក ប៉ែន ប៊ុណ្ណារ៍
យល់ស្របនឹងសំណើរបស់យុវជន ដែលចង់ឲ្យព្រះមហាក្សត្រចេញព្រះភក្ត្រ
ការពារព្រៃឈើ។ លោក យល់ថា បើព្រះអង្គចូលរួមសកម្មភាពការពារព្រៃឈើ
បទល្មើសព្រៃឈើនឹងថមថយ។ ប៉ុន្ដែទោះយ៉ាងណា សង្គមស៊ីវិលរូបនេះ នៅតែយល់ថា
បើមន្ត្រីនៅមូលដ្ឋានធ្វើតាមតែច្បាប់ចែង និងមិនខ្លាចអំណាចឈ្មួញ
នោះបទល្មើសព្រៃឈើនឹងថយចុះជាមិនខាន
ទោះជាមិនមានវត្តមានព្រះមហាក្សត្រក៏ដោយ។
រដ្ឋធម្មនុញ្ញនៃ ជំពូកទី២ មាត្រា ៧ ចែងថា
ព្រះមហាក្សត្រកម្ពុជា ទ្រង់គ្រងរាជ្យសម្បត្តិ ប៉ុន្តែទ្រង់មិនកាន់អំណាចឡើយ។
ព្រះមហាក្សត្រ ទ្រង់ជាព្រះប្រមុខរដ្ឋមួយជីវិត។ អង្គព្រះមហាក្សត្រ
មិនអាចនរណារំលោភបំពានបានឡើយ។ ឯមាត្រា ៨ វាក្យខណ្ឌទី២ ចែងថា ព្រះមហាក្សត្រ
ទ្រង់ជាអ្នកធានាឯករាជ្យជាតិ អធិបតេយ្យ និងបូរាណភាពទឹកដី នៃព្រះរាជាណាចក្រកម្ពុជា
ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និង
ការគោរពសន្ធិសញ្ញាអន្តរជាតិ។
ពលរដ្ឋមើលឃើញថា
កន្លងមកព្រះមហាក្សត្របានដើរធ្វើព្រះរាជសកម្មភាពចែកអំណោយដល់មនុស្សចាស់ជរាបានច្រើនហើយ
ប៉ុន្តែពួកគេចង់ឃើញព្រះអង្គមានព្រះរាជសកម្មភាពបន្ថែមទៀត នៅក្នុងសង្គម
ក្រៅពីចែកអំណោយឲ្យចាស់ជរានៅតាមជនបទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ
យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Loading...
No comments:
Post a Comment
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រក្សាសិទ្ធគ្រាប់យ៉ាងដោយ CNRP Media Team
http://www.freedomnews.club/